استانادا قاسيەتتى قۇربان ايتتا 28 توننا ەت تاراتىلدى
«بيىل استانا اكىمدىگى قۇرباندىق شالۋ ءۇشىن ارنايى 8 نىسان بەكىتتى. وسى ورىنداردا سەگىز مەشىتتىڭ قىزمەتكەرلەرى مەن مەدرەسە ۇستازدارى، شاكىرتتەرى جانە «زەكەت» قورى وكىلدەرى قىزمەت ەتتى. اتالمىش ورىنداردا قۇرباندىق شالۋ ءراسىمىنىڭ شاريعات تالابىنا ساي ءوتۋى ءجىتى قاداعالانىپ، قۇرباندىق ەتتەرى قابىلداندى. قاسيەتتى قۇربان ايتتا «راببىڭ ءۇشىن قۇربان شال» قايىرىمدىلىق شاراسى اياسىندا 3582 وتباسىنا جانە 40 قا جۋىق قورلار مەن مەكەمەلەرگە 28 توننا قۇرباندىق ەتى تاراتىلدى»، - دەپ اتاپ وتىلگەن باسپا ءسوز قىزمەتى مالىمەتىندە.
باس ءمۇفتي ەرجان قاجى مالعاجى ۇلى ايتۋلى مەرەكەدە ءبىرقاتار يگى شارالارعا قاتىستى. «ازىرەت سۇلتان» مەشىتىندە ەلوردا جۇرتشىلىعىمەن بىرگە ايت نامازىنا قاتىسقان باس ءمۇفتي وسى كۇنى قالاداعى جەتىم بالالار ۇيىندە «ايالى الاقان» شاراسىنا قاتىستى. بەيكۇنا سابيلەرگە سىيلىقتار تاراتىلىپ، باتا-تىلەك جاسالدى.
ق م د ب نايب ءمۇفتيى، استانا قالاسىنىڭ باس يمامى ناۋرىزباي قاجى تاعان ۇلى ايتۋلى مەرەكەنىڭ قۇرمەتىنە ۇيىمداستىرىلعان يگى شارالارعا بۇقارامەن بىرگە قاتىسىپ، جۇرتشىلىقتى ايت مەيرامىمەن قۇتتىقتادى. نايب ءمۇفتي ۇلىق مەرەكەنى ۇلتتىق ناقىشتا اتاپ ءوتۋ ماقساتىندا وتكىزىلگەن سپورتتىق سايىستارعا دا قاتىسىپ، جاماعاتتى اتالمىش الاماندا بەلسەندى بولۋعا شاقىردى (ارقان تارتۋ، قول كۇرەستىرۋ، اسىق اتۋ، توعىز قۇمالاق، كىر تاسىن كوتەرۋ ت. ب.). سايىستا توپ جارىپ، وزا شاپقان ازاماتتار مەشىتتىڭ ارنايى سىي-سياپاتىنا يە بولدى. قۇربان ايت مەيرامىندا بالعىن بالالار مەن جەتكىنشەك جاستار دا نازاردان تىس قالمادى. 200 بالاعا ايتتىق-سىيلىق تاراتىلىپ، ۇلكەن قالانىڭ كىشكەنتاي تۇرعىندارى مەرەكەنىڭ مول قۋانىشىن سەزىندى.
سونىمەن قاتار، قالا اكىمدىگىنىڭ قولداۋىمەن «نۇر استانا»، «ازىرەت سۇلتان»، «س. عىلماني» مەشىتتەرىنىڭ اۋلاسىنا كيىز ۇيلەر قۇرىلىپ، باۋىرساق، قىمىز سىندى مەرەكەلىك ءدام ۇسىنىلدى.
«نۇر استانا» ورتالىق مەشىتىندە قالاداعى قارتتار ءۇيىنىڭ 50 تۇرعىنىنا ارنايى داستارقان جايىلىپ، «استانا فيلارمونياسى» انشىلەرىنىڭ قاتىسۋىمەن وتكەن كونسەرت كوپشىلىككە مەرەكەلىك كوڭىل- كۇي سىيلادى.
«سونىمەن قاتار، استانا قالاسىنداعى قارتتار ۇيىندە «قارتتارىم -اسىل قازىنام» اتتى كەزدەسۋ ۇيىمداستىرىلىپ، قاريالارعا مەرەكەلىك داستارقان جايىلدى. مەشىت يمامدارى استانا قالاسىنداعى 166/22 جانە 166/10 ەڭبەكپەن تۇزەۋ مەكەمەلەرىندەگى جازاسىن وتەۋشىلەرمەن كەزدەسىپ، ايتتىق داستارقان جاسالىپ، قۇرباندىق ەتتەرى تاراتىلدى. مەرەكە كۇندەرى ءدىن قىزمەتكەرلەرى 1№ قالالىق اۋرۋحاناداعى ەمدەلۋشىلەرگە دە ارنايى بارىپ، ايتتىق سىي-سياپات جاسادى»، - دەلىنگەن حابارلامادا.
ال قۇربان ايت مەرەكەسىنىڭ ءداستۇرلى يگى شاراسىنا اينالعان «راببىڭ ءۇشىن قۇربان شال» قايىرىمدىلىق اكسياسى بارىسىندا 104 ءىرى قارا مال قۇرباندىققا شالىندى.
