الماتىداعى دەنساۋلىق ساقتاۋ كورمەسىنە 28 ەلدەن 300 گە جۋىق كومپانيا كەلدى - فوتو
«KIHE 2015 - «دەنساۋلىق ساقتاۋ» حالىقارالىق كورمەسى - قازاقستاندا مەديتسينا سالاسىنداعى ەڭ ءىرى تاجىريبە الماسۋ الاڭدارىنىڭ ءبىرى. وعان اۋرۋلارعا دياگنوز جاساۋعا جانە ولاردى ەمدەۋگە ارنالعان ونىمدەر شىعاراتىن وتاندىق جانە شەت ەلدىك وندىرۋشىلەر قاتىسۋدا.
2011-2015 -جىلدارعا ارنالعان «سالاماتتى قازاقستان» مەملەكەتتىك باعدارلاماسى مەديسينا قىزمەتكەرلەرى قاۋىمىنىڭ الدىنا، كورسەتىلەتىن مەديتسينالىق قىزمەتتەردىڭ ساپاسىن ارتتىرۋ ارقىلى قازاقستاندىقتاردىڭ دەنساۋلىعىن نىعايتۋ مىندەتى قويىلعان. ال جىل سايىن وتكىزىلەتىن بۇل كورمە دەنساۋلىق ساقتاۋ سالاسىنداعى جاڭا تەحنولوگيالارمەن تانىسۋعا، تاجىريبە الماسۋعا، ەمدەۋدىڭ جاڭا ادىستەرىن ۇيرەنۋگە جانە دەنساۋلىق ساقتاۋ سالاسىنىڭ دامۋ كەلەشەگىن انىقتاۋعا مۇمكىندىك بەرەدى» - دەدى ءوزىنىڭ العى سوزىندە ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى الەكسەي سوي.
ايتا كەتەلىك، اتالعان كورمەگە ازەربايجان، گرۋزيا، مىسىر جانە يزرايل ەلدەرىنىڭ مەديتسينا سالاسىندا قىزمەت اتقاراتىن كومپانيالارى ءبىرىنشى رەت قاتىسۋدا. سونىمەن قاتار، تۇركيا مەن وڭتۇستىك كورەيانىڭ كومپانيالار توبى كەڭىنەن ۇسىنىلعان. سونداي- اق، العاش رەت - ۆەنگريا، ۇزاق ۇزىلىستەن كەيىن - ءۇندىستان جانە جىل سايىنعى قاتىسۋشىلار - گەرمانيا، قىتاي جانە رەسەي بيىل وزدەرىنىڭ ستەندتەرىمەن ۇسىنىپ وتىر.
وتاندىق دەنساۋلىق ساقتاۋ سالاسىنىڭ ەكسپوزيتسياسى قازاقستان رەسپۋبليكاسىنىڭ پرەزيدەنتىنىڭ ءىس باسقارماسى مەديتسينالىق ورتالىعىنىڭ الماتى قالاسىنداعى ورتالىق كلينيكالىق اۋرۋحاناسىن، الماتى قالاسى رەپرودۋكتسيالىق مەديتسينا ينستيتۋتى، سونداي- اق قۇرامىنا كىرەتىن بارلىق عىلىمي ورتالىقتاردىڭ مەديتسينالىق قىزمەتتەرى كورسەتىلەتىن «ۇلتتىق مەديتسينالىق گوسپيتال» ا ق- ىن جانە تاعى باسقالاردى قامتيدى.
كورمە شەڭبەرىندە «ەمدەۋ- ساۋىقتىرۋ جانە مەديتسينالىق تۋريزم» تاقىرىبى ەكىنشى جىل قاتارىنان بولەك ەكسپوزيتسيا بولىپ ۇسىنىلدى. ودان باسقا، كورمەنىڭ تاعى ءبىر قىزىقتى ءبولىمى «ەستەتيكالىق مەديتسينا» سەكتسياسى بولماق. ول سۇلۋلىق يندۋسترياسى، ەستەتيكالىق مەديتسينا جانە پلاستيكالىق حيرۋرگيا سالاسىنىڭ جەتەكشى وندىرۋشىلەرى مەن وكىلدەرىن ۇسىنادى.
جوباعا ق ر دەنساۋلىق ساقتاۋ جانە الەۋمەتتىك دامۋ مينيسترلىگى، الماتى قالاسى اكىمدىگى، الماتى قالاسى دەنساۋلىق ساقتاۋ باسقارماسى، قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مەديتسينالىق جانە فارماتسيەۆتيكالىق قىزمەتتى باقىلاۋ كوميتەتى، «ۇلتتىق مەديتسينالىق حولدينگ» اق، قر- داعى حالىقارالىق فارماتسيەۆتيكالىق وندىرۋشىلەر قاۋىمداستىعى جانە قر ۇلتتىق مەديتسينا قاۋىمداستىعى رەسمي تۇردە قولداۋ كوسەتتى.
كورمە 15- مامىرعا دەيىن جالعاسادى.
اۆتور: جاپپاربەرگەن ايبوتا
