ورتالىق ازيادا 28 - ناۋرىز كۇنى 100 دەن استام عيماراتتىڭ جارىعى وشەدى
بيىل تەك سيمۆوليكالىق تۇردە جاپپاي جارىق ءسوندىرىلىپ قانا قويماي، قازاقستاننىڭ بيولوگيالىق الۋان تۇرلىلىگىن ساقتاپ قالۋعا ارنالعان جوبالارىن قولداۋعا مۇمكىندىك بەرىلەدى.
«بۇكىل دۇنيەجۇزىندەگى ادامدار ۇيلەرىنىڭ جارىعىن عالامشارعا دەگەن قامقورلىعىنىڭ بەلگىسى رەتىندە سوندىرەتىن «جەر ساعاتى» شاراسىنىڭ وتۋىنە از ۋاقىت قالدى.
وسى ايدىڭ ىشىندە كەز كەلگەن ادام www.acbk.kz سايتىندا كورسەتىلگەن بەس جوبىنىڭ بىرىنە قولداۋ كورسەتە الادى»، - دەلىنگەن حابارلامادا.
قوردىڭ باسشىسى الان بەسەننىڭ ايتۋىنشا، جوبالار قازاقستاننىڭ بيولوگيالىق الۋان تۇرلىلىگىن ساقتاپ قالۋعا عانا ەمەس ادامدارعا قورشاعان ورتامەن ۇيلەسىمدى ءومىر ءسۇرۋدى ۇيرەتۋگە باعىتتالعان. «جەر ساعاتى» اكتسياسىن قولداۋعا ارنالعان شارالار 28 - ناۋرىزدا استانا ۋاقىتى بويىنشا ساعات 20.30-دا «حان شاتىرى» ورتالىعىندا قورىتىندىلانادى. بۇل كۇنى قازاقستان مەن ورتالىق ازيا بويىنشا كوپكە بەلگىلى 100 دەن استام مەكەمە مەن عيماراتتىڭ جارىعى سوندىرىلەدى.
قوردىڭ مالىمەتىنشە، بۇل اكتسيانى ق ر ەنەرگەتيكا مينيسترلىگىنىڭ «جاسىل ەكونوميكا» دەپارتامەنتى، ق ر اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى، استانا، الماتى مەن ايماق اكىمدىكتەرى قولداپ وتىر.
شاراعا رەسمي تۇلعالار قاتىسادى دەگەن بولجام بار، اكتسيانىڭ ۇرانى: «بۇكىل الەم ءبىر عالامشار ءۇشىن!»
ايتا كەتەيىك، «جەر ساعاتى» - ناۋرىزدىڭ سوڭعى سەنبىسىندە دۇنيەجۇزىلىك تۇمسا تابيعات قورى (WWF) جىل سايىن وتكىزەتىن جانە حالىقتى ءبىر ساعاتقا جارىق پەن ەلەكتر جابدىقتارىن سوندىرۋگە شاقىراتىن شارا. اكسيانىڭ ماقساتى - الەم جۇرتشىلىعىنىڭ نازارىن كليماتتىڭ جاھاندىق وزگەرۋ پروبلەماسىنا اۋدارۋ جانە ادامداردى ەنەرگيا مەن باسقا دا تابيعي رەسۋرستاردى ۇنەمدەۋگە شاقىرۋ. كليماتتىڭ وزگەرۋىنە قارسى باعىتتالعان شاراعا بۇكىل الەمنەن 1,3 ميللياردتان استام ادام، 128 ەلدىڭ 4616 دان اسا قالاسى، ءبىر ساعاتقا ەلەكتر قۋاتىن وشىرۋگە ۋادە بەرگەن.
