تايلاند كورولىنىڭ بالاسى 27 جىلدان كەيىن ەلگە ورالىپ، جۇرتتى تاڭعالدىردى
ول 30 جىلعا جۋىق ۋاقىت ىشىندە كورولدىككە ءبىرىنشى رەت كەلىپ تۇر، دەپ حابارلايدى قازاقپارات CNN گە سىلتەمە جاساپ.
قۇراما شتاتتاردا تۇرىپ، جۇمىس ىستەيتىن 42 جاستاعى ۆاچاراەسورن سەيسەنبى كۇنى بانگكوكتاعى از قامتىلعان وتباسىلاردان شىققان بالالارعا ارنالعان بالاباقشانى كورىپ قايتقان. بالالاردى كۇتۋگە ارنالعان قوردا جۋرناليستەرگە سۇحبات بەرگەن ۆاچاراەسورن «تايلاندقا ورالعانىما قۋانىشتىمىن، مەنى جىلى قارسى الدى. مەن كوپ ۋاقىت، ياعني 27 جىل ەلدە بولمادىم»، - دەپ مالىمدەدى.
ۆاچاراەسورن 71 جاستاعى كورول ۆاچيرالونگكورن مەن ونىڭ ەكىنشى ايەلى يۋۆادحيدا پولپراسەتتىڭ ءتورت ۇلىنىڭ ەكىنشىسى. ول ايەلىمەن 1994 -جىلى وتاۋ قۇرىپ، كەيىن اجىراسىپ كەتكەن. اجىراسقاننان كەيىن ۆاچاراەسورن اناسى جانە باۋىرلارىمەن بىرگە ەميگرانتتار رەتىندە كورولدىك دارەجەسىنەن ايىرىلعان بولاتىن.
كورول سارايى ۆاچاراەسورننىڭ تايلاندقا كەلگەنى تۋرالى رەسمي اقپارات نەمەسە كوپشىلىككە مالىمدەمە جاساعان جوق. ۆاچاراەسورننىڭ وتانىنا كەلۋى كورول وتباسىنداعى قيىن كەزەڭدەرگە تاپ كەلگەنى قىزىق. كورولدىڭ ۇلكەن بالاسى، 44 جاستاعى حانشايىم - بادجراكيتيابحا جەلتوقساندا جۇرەك اۋرۋىنا بايلانىستى ەس- ءتۇسسىز كۇيدە اۋرۋحاناعا جاتقىزىلدى. CNN تايلاند كورولىنىڭ ناقتى مۇراگەرى جوق ەكەنىن جازدى.
1952 -جىلى دۇنيەگە كەلگەن ۆاچيرالونگكورن 2016 -جىلى ەلدى 70 جىل باسقارعان اكەسى، كورول پحۋميپون ادۋليادەتا قايتىس بولعاننان كەيىن تاققا وتىردى. كورول ءتورت رەت ۇيلەنگەن جانە ونىڭ جەتى بالاسى - ەكى قىزى مەن بەس ۇلى بار. ولاردىڭ تەك بىرەۋى عانا رەسمي حانزادا بولىپ مويىندالعان. سول سەبەپتى ەكىنشى ۇلىنىڭ تايلاندقا كەلگەنىنە كوپشىلىك تاڭعالدى.
