ءبىر كۇندە الماتى قالالىق پوليتسيا دەپارتامەنتىنە 27 رەت شابۋىل جاسالعان
مۇنداي مالىمەت باس پروكۋراتۋرا ۇسىنعان «قاڭتار وقيعاسى: دەرەك پەن دايەك» دەرەكتى فيلمىندە كەلتىرىلدى، دەپ حابارلايدى قازاقپارات ءتىلشىسى.
باس پروكۋراتۋرا دەرەگىنشە، 5-قاڭتاردا بۇلىكشىلەر الماتىداعى اۋەزوۆ پەن المالى اۋداندارىنىڭ پوليتسيا باسقارمالارىن جانە قالالىق پوليتسيا دەپارتامەنتىن باسىپ الماق بولعان. الماتى قالالىق پوليتسيا دەپارتامەنتىنە 27 رەت شابۋىل ۇيىمداستىرىلعان. دەگەنمەن، ءتارتىپ ساقشىلارى تۇنگى ساعات 12 دەن تاڭعى 5 كە دەيىن بۇلىكشىلەرگە تويتارىس بەرىپ، قورعانىستى ۇستاپ تۇرعان.
سونىمەن قاتار، قاڭتار وقيعاسىنىڭ حرونولوگياسى باياندالعان دەرەكتى فيلمدە وزگە وڭىرلەردەگى قارۋلى شابۋىلدار دا قامتىلعان. اتاپ ايتقاندا، ءدال وسى كۇنى قىلمىسكەرلەر قىزىلورداداعى جەرگىلىكتى پوليتسيا قىزمەتى مەن پوليتسيا دەپارتامەنتىنىڭ عيماراتىندا ويران سالماق بولعان. ال بىرەر ساعاتتان سوڭ بۇلىكشىلەر تالدىقورعان، تاراز جانە الماتى مەن جامبىل وبلىستارىنىڭ پوليتسيا دەپارتامەنتتەرىن باسىپ العان.
