17:44, 13 - تامىز 2021 | GMT +6
تۇركياداعى سۋ تاسقىنى: 27 ادام مەرت بولدى
انكارا. انادولى- قازاقپارات - تۇركيانىڭ سولتۇستىگىندەگى كاستامونۋ پروۆينتسياسىندا سۋ تاسقىنى سالدارىنان 25 ادام قازا تاپتى، كورشىلەس سينوپ پروۆينتسياسىندا ەكى ادام مەرت بولدى. بارتىندا ءىز- ءتۇزسىز جوعالعان ءبىر ادام ىزدەستىرىلىپ جاتىر،
دەپ حابارلايدى قازاقپارات انادولى اگەنتتىگىنە سىلتەمە جاساپ.
بۇل تۋرالى توتەنشە جاعدايلار سالدارىنىڭ الدىن الۋ جانە جويۋ باسقارماسى (AFAD) مالىمدەدى. بارلىق ءتيىستى مەكەمەلەر، ۇجىمدار مەن كولىك قۇرالدارى ەۆاكۋاتسيالىق، ىزدەستىرۋ- قۇتقارۋ جۇمىستارىنا جۇمىلدىرىلعان.
بارتىندا ەلەكتر بەرۋ تولىعىمەن قالپىنا كەلتىرىلدى، ال كاستامونۋدا 112 ، سينوپتا 86 اۋىل ءالى كۇنگە دەيىن جارىقسىز قالىپ وتىر. كاستامونۋ، بارتىن مەن سينوپتا 833 ادام پسيحولوگيالىق جانە الەۋمەتتىك كومەك الۋدا. AFAD دەرەكتەرىنە ساي، بارتىندا 232، كاستامونۋدا 925، ال سينوپتا 472 ادام ەۆاكۋاتسيالانعان.
اۆتور: ءبيبىحان سەرىكوۆا