سوڭعى ءبىر ايدا 27 بالا سۋعا باتىپ كەتتى - مينيسترلىك
قازاقپارات بۇل تۋرالى ق ر توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
سۋعا شومىلۋ ماۋسىمى باستالعالى (1-ماۋسىم) ءوز كۇشتەرىن دۇرىس باعالاماۋ، ماس كۇيىندە شومىلۋ، تىيىم سالىنعان جەرلەرگە ءتۇسۋ، سۋعا باتىپ بارا جاتقان ادامدى قۇتقارۋ كەزىندە جانە ەرەسەكتەردىڭ بالالاردى قاراۋسىز قالدىرۋى سالدارىنان ەلىمىزدىڭ سۋ ايدىندارىندا 72 ادام، ونىڭ ىشىندە 27 بالا كوز جۇمدى. سۋعا باتۋ وقيعالارىنىڭ ەڭ كوپ سانى تۇركىستان (14)، قىزىلوردا (8)، الماتى (7) جانە شىعىس قازاقستان (7) وبلىستارىندا تىركەلگەن.
سۋ ايدىندارىنىڭ جاعالاۋ اۋماعىن پاترۋلدەۋ جۇمىستارىن جۇرگىزۋ كەزىندە قۇتقارۋشىلار مەن پوليتسيا قىزمەتكەرلەرى 59 ادامدى، ونىڭ ىشىندە 8 بالانى قۇتقارىپ قالدى. شومىلۋ ماۋسىمى كەزىندە قايعىلى جاعدايلاردى بولدىرماۋ ءۇشىن ازاماتتىق قورعاۋ ورگاندارى پروفيلاكتيكالىق شارالار جۇرگىزەدى. حالىق اراسىندا 323 مىڭنان استام بۋكلەت پەن پاراقشا تاراتىلدى. ازاماتتارمەن 2 مىڭعا جۋىق جيىن وتكىزىلدى. پروفيلاكتيكالىق جۇمىسقا 5600 گە جۋىق ۆولونتەر دە تارتىلعان.
سونداي-اق ءمالىم ەتىلگەندەي، قۇتقارۋشىلار مەن پوليتسيا قىزمەتكەرلەرى قوعامدىق ورىنداردا ءتارتىپ بۇزۋدى انىقتاۋ جانە سۋ ايدىندارىنداعى قاۋىپسىزدىكتى ساقتاۋ بويىنشا بىرلەسكەن رەيدتەر وتكىزەدى. ناتيجەسىندە قوعامدىق ورىنداردا بولۋ ەرەجەلەرىن بۇزعانى ءۇشىن 1 مىڭعا جۋىق ادام، ال ورتاق سۋ پايدالانۋ ەرەجەلەرىن بۇزعانى ءۇشىن 14 ادام اكىمشىلىك جاۋاپكەرشىلىككە تارتىلدى، 1 مىڭنان استام ازاماتقا ەسكەرتۋ جاسالدى.
ت ج م ازاماتتاردى سۋ ايدىندارىندا قاۋىپسىزدىك ەرەجەلەرىن ساقتاۋعا شاقىرادى، ءبىرىنشى كەزەكتە:
- الكوگولگە جانە ەسىرتكىگە ماس كۇيدە سۋعا كىرۋگە جانە شومىلۋعا؛
- قايىقتاردان، كاتەرلەردەن، ايلاقتاردان، سونداي-اق وسى ماقساتتارعا بەيىمدەلمەگەن قۇرىلىستاردان سۋعا سەكىرۋگە؛
- تەكسەرىلمەگەن جانە جابدىقتالماعان جەرلەردە سۇڭگۋگە؛
- ءجۇزۋ شەكاراسىن كورسەتەتىن بەلگىدەن اسىپ كەتۋگە؛
- جۇزۋگە ارنالماعان زاتتاردا جۇزۋگە؛
- بالالارعا ەرەسەك ادامداردىڭ قاراۋىنسىز شومىلۋعا تىيىم سالىنادى.
