قازاقستاندىق سپورتشى قارسىلاسىن 27 سەكۋندتىڭ ىشىندە ۇرىپ قۇلاتتى - كەسكىن
استانا. قازاقپارات - حورۆاتيانىڭ سپليت قالاسىندا وتكەن كومبات دجيۋ-دجيتسۋدان VII الەم چەمپيوناتىندا قازاقستاندىق ەرلان تىلەۋىمبەتوۆ فينالدا قارسىلاسىن جارتى مينۋتقا جەتكىزبەي سۇلاتىپ سالىپ، الەمنىڭ ءۇش دۇركىن چەمپيونى اتاندى.
ايتا كەتەيىك، ەرلان تىلەۋىمبەتوۆ جاستار اراسىندا الەمنىڭ ەكى دۇركىن چەمپيونى بولعان.
«حالىقارالىق ارەنادا ءبىز ەلىمىزدىڭ ابىرويىن قورعايمىز. جەكپە-جەك كەزىندە مەنىڭ جەڭىسىم قازاقستاننىڭ جەڭىسى ەكەنىن ءبىر ساتكە دە ۇمىتپايمىن»، - دەپ جازدى ەرلان يستاگرامداعى رەسمي پاراقشاسىندا.
جالپى بيىلعى الەم چەمپيوناتىندا ەلىمىزدىڭ نامىسىن 4 سپورتشى: ەرلان تىلەۋىمبەتوۆ، تەمىرلان ءايسادىلوۆ، شىڭعىس پارىمبەكوۆ جانە الىشەر ۇمىتبەكوۆ قورعادى.
كوماندانىڭ قورجىنىنا العاشقى التىندى 70 كەلىگە دەيىنگى سالماقتا ونەر كورسەتەتىن الماتى قالاسىنىڭ سپورتشىسى تەمىرلان ءايسادىلوۆ سالدى.
