ەش تامىر- تانىسسىز 27 جاس مامان ۇلتتىق بانكتە قىزمەتكە تاعايىندالدى

الماتى. قازاقپارات - قازاقستان ۇلتتىق بانكى ەلىمىزدىڭ باستى قارجى ينستيتۋتىندا جۇمىس ىستەۋ ءۇشىن جاس مامانداردى جانە جوعارى وقۋ ورىندارىنىڭ تۇلەكتەرىن ىزدەستىرۋ جونىندەگى ناۋقان قورىتىندىسىن شىعاردى،

دەپ حابارلايدى قازاقپارات ءتىلشىسى بانكتىڭ باسپا ءسوز قىزمەتىنە سىلتەمە جاساي وتىرىپ.

 «ۇمىتكەرلەردەن وتىنىشتەر 2016 -جىلعى 20 -  قىركۇيەك پەن 20 - قازان ارالىعىندا قابىلداندى. قاراۋعا 960 تۇيىندەمە ءتۇستى. ۇمىتكەرلەردى ىرىكتەۋ پروتسەسى بىرنەشە ايعا سوزىلدى. ءتيىستى ءبىلىمى، جۇمىس تاجىريبەسى ەسكەرىلدى جانە ۇلتتىق بانكتىڭ قىزمەتكەرى بولعىسى كەلەتىن ۇمىتكەرلەر ىرىكتەۋدىڭ بىرنەشە كەزەڭىنەن ءوتتى. ناتيجەسىندە، 48 ۇمىتكەر ىرىكتەلىپ، 27 ادام لاۋازىمدى قىزمەتكە تاعايىنداۋعا ۇسىنىلدى، 21 ادام ۇلتتىق بانكتىڭ كادر رەزەرۆىنە الىندى»، - دەدى بانك ءتوراعاسى دانيار اقىشيەۆ.

 د. اقىشيەۆتىڭ ايتۋىنشا، بانك بۇدان كەيىن دە بۇل ناۋقاندى وتكىزۋدى جالعاستىرادى. ول تۋرالى اقپارات ۇلتتىق بانكتىڭ سايتىندا، سونداي- اق الەۋمەتتىك جەلىلەردەگى رەسمي اككاۋنتتارىندا جاريالاناتىن بولادى.

 ايتا كەتەيىك، بۇل ناۋقاننىڭ باستالعانى تۋرالى قازاقستان ۇلتتىق بانكىنىڭ ءتوراعاسى دانيار اقىشيەۆ 2016 -جىلعى 20 - قىركۇيەكتەگى ونلاين- كونفەرەنسيادا مالىمدەگەن بولاتىن.

 اۆتور: الماس مۇقاش