زيكا ۆيرۋسىنا بايلانىستى قازاقستاندىقتارعا 27 ەلگە بارماۋعا كەڭەس بەرىلەدى

استانا. قازاقپارات - وڭتۇستىك امەريكا ەلدەرىندە زيكا بەزگەگىنىڭ تارالۋىنا بايلانىستى قازاقستاندىقتارعا اتالعان مەملەكەتتەرگە بارماۋعا كەڭەس بەرىلەدى، دەپ حابارلادى تۇتىنۋشىلار قۇقىعىن قورعاۋ كوميتەتىنەن.

ق ر ۇلتتىق ەكونوميكا مينيسترلىگى تۇتىنۋشىلار قۇقىعىن قورعاۋ كوميتەتىنىڭ حابارلاۋىنشا، دۇنيەجۇزىلىك دەنساۋلىق ساقتاۋ ۇيىمىنىڭ رەسمي اقپاراتىنا سايكەس 2015-جىلدىڭ ساۋىرىندە برازيليادا، ودان كەيىن وڭتۇستىك امەريكانىڭ باسقا دا مەملەكەتتەرىندە زيكا بەزگەگىنىڭ تارالۋى بايقالادى.

اعىمداعى جىلدىڭ 27- قاڭتارىنداعى جاعدايعا سايكەس سولتۇستىك امەريكالىق، وڭتۇستىك امەريكالىق جانە ازيا-تىنىق مۇحيتى وڭىرلەرىنىڭ مىنا 27 ەلىندە زيكا بەزگەگى تىركەلگەن: باربادوس، بوليۆيا، برازيليا، كابو-ۆەردە، كولۋمبيا، ەكۆادور، سالۆادور، فيدجي، فرانتۋزدىق گۆيانا، گۆادەلۋپا، گۆاتەمالا. گايانا، گايتي، گوندۋراس، مالديۆا، مارتينيكا، مەكسيكا، جاڭا كالەدونيا، پاناما، پاراگۆاي، پۋەرتو-ريكو، سەن-مارتەن، ساموا، سولومونوۆ ارالدارى، سۋرينام، تايلاند، ۆەنەسۋەلا.

زيكا بەزگەگى تروپيكالىق وڭىرلەردە تىرشىلىك ەتەتىن Aedesalbopictus پەن аegypti   ماسالارى شاققان كەزدە ادامدار اراسىندا تارالادى. بەزگەك ادامنان ادامعا جۇقپايدى. اۋرۋ 4-7 كۇنگە سوزىلىپ، جەڭىل جانە ورتاشا اۋىر كلينيكالىق فورمادا ءوتىپ، ادام ساۋىعىپ كەتەدى.

زيكا بەزگەگى جۇققان كەزدەگى نەگىزگى بەلگىلەر مىناداي: دەنە تەمپەراتۋراسى كوتەرىلەدى، تەرى بورتەدى، بۋىن، باس اۋىرادى، كەيدە جۇرەك اينيدى. ايتا كەتەرلىگى، ايەلدەردىڭ جاتىرىنداعى شاراناعا كەرى اسەر ەتەتىندىگى تۋرالى اقپارات بار. جۇكتىلىكتىڭ 3-4 ايىندا بەزگەك جۇقتىرعان ايەلدەردىڭ شاراناسىنا كەرى اسەرى بار.

وسىعان بايلانىستى تۇتىنۋشىلار قۇقىعىن قورعاۋ كوميتەتى قازاقستاندىقتارعا ۇسىنىلعان اقپاراتتاردى شەتەلگە ساپارلارىن جوسپارلاۋ كەزىندە قاپەرگە الۋعا، مۇمكىندى بولسا كەيىنگە قالدىرۋعا، اسىرەسە جۇكتى ايەلدەردە ەپيدەميولوگيالىق احۋال تۇراقتاعانعا دەيىن زيكا بەزگەگى ءورشىپ تۇرعان ەلدەرگە بارماۋعا كەڭەس بەرەدى.

اتالعان وڭىردەگى ەلدەرگى بارۋ تۋرا كەلگەن جاعدايدا قاۋىپسىزدىك شارالارىن قولدانۋ قاجەت. قوناق ۇيدە تەرەزەسى ارنايى تورمەن جابىلماسا، وندا ونى اشپاۋ كەرەك جانە اۋا باپتاعىشتى پايدالانعان ءجون. جوعارىدان اتالعان ەلدەردە بولعان كەزدە جانە ورالعاننان كەيىن اۋرۋ بەلگىلەرى بايقالسا، بىردەن مەديتسينالىق كومەككە جۇگىنۋ كەرەك.

اۆتور: مارلان جيەمباي