14:35, 25 - ءساۋىر 2015 | GMT +6
پرەزيدەنت سايلاۋىنىڭ الدىن الا قورىتىندىسى 27 - ساۋىردە جاريالانادى
استانا. قازاقپارات - ق ر پرەزيدەنتى سايلاۋىنىڭ الدىن الا قورىتىندىسى 27 - ساۋىردە جاريالانادى. بۇل تۋرالى بۇگىن ق ر ورتالىق سايلاۋ كوميسسياسىنىڭ مۇشەسى ءلاززات سۇلەيمەن ءمالىم ەتتى.
«داۋىس بەرۋ اياقتالعاننان كەيىن ۋچاسكەلىك سايلاۋ كوميسسيالارى 12 ساعاتتىڭ ىشىندە داۋىستاردى ساناۋعا مىندەتتى»، - دەدى ول ب ا ق وكىلدەرىنىڭ ساۋالىنا وراي.
ل. سۇلەيمەننىڭ اتاپ وتۋىنشە، وسىدان كەيىن قۇجاتتار اۋماقتىق سايلاۋ كوميسسيالارىنا جەتكىزىلىپ، ءاربىر سايلاۋ كوميسسياسى دەڭگەيىندە داۋىس بەرۋدىڭ الدىن الا قورىتىندىسى بويىنشا سايكەسىنشە حاتتاما جاسالادى.
«بۇل قۇجاتتار ورتالىق سايلاۋ كوميسسياسىنا جەتكىزىلگەننەن كەيىن ءبىز بىردەن الدىن الا قورىتىندىنى شىعارامىز. 7 كۇننىڭ ىشىندە ءبىز سايلاۋدىڭ سوڭعى قورىتىندىسىن شىعارۋعا مىندەتتىمىز»، - دەدى كوميسسيا مۇشەسى.
اۆتور: مارلان جيەمباي
