جەڭىسكە دەيىن 27 كۇن: ا ق ش پرەزيدەنتى ف. رۋزۆەلتتىڭ ءولىمى
«قازاقپارات» ح ا ا وقىرماندار نازارىنا سول كەزدەگى حرونيكانى ۇسىنادى.
1945 -جىل 12 -ءساۋىر.
چەحوسلوۆاكيا. كەڭەس اقپاراتتىق بيۋروسى حابارلايدى: براتيسلاۆانىڭ سولتۇستىك- شىعىسى مەن سولتۇستىگىنە قاراي 2 -ۋكراينا فرونتى قالا مەن سكاليتسا تەمىر جول ستانساسى جانە 30 دان استام ءوزدى ەلدى-مەكەندى جاۋلاپ الدى. ولاردىڭ ىشىندە ترەنچ تەپلا، وپاتوۆا، كوحانوۆتسە، گالۋزيتسە، گورنى- بزينتسە، ۆربوۆتسە، رادەيوۆ، كاتوۆ، گوليچ، كوپچاني بار...
اۆستريا. ۆەنانىڭ سولتۇستىك- شىعىسىنا قاراي كەڭەس اسكەرى درەزينگ، ەدەنشپايگەن، لويدەستال، ەردپرەس، حوحەنرۋپپەرسدورف، اۋەرشتال ەلدى- مەكەندەرىن باسىپ الدى. بوككفليس، ادەركلاا، رااسدورف، ەسسلينگ، گروسس ەنتسەرسدورف جانە ەيبەسبرۋنن تەمىرجول ستانساسىن جاۋلاپ الدى. ۆەنادا 3- ۋكراينا فرونتىنىڭ اسكەرى دۋناي كانالى مەن دۋناي وزەنىنىڭ اراسىندا ورنالاسقان قالا اۋداندارىندا كۇرەس جۇرگىزدى. مۇندا ولار 60 تان استام كۆارتالدى باسىپ الدى.
سومباتەل قالاسىنىڭ باتىسىنا جانە وڭتۇستىك- باتىسىنا قاراي فرونت اسكەرى شابۋىلىن جالعاستىرىپ، اۆستريانىڭ گيۋسسينگ قالاسى (نەمەتۋيۆار) مەن 40 تان استام وزگە ەلدى مەكەندى، سونىڭ ىشىندە ماركت اللاۋ، ولبەندورف، وبەرنەيبەرگ، ميحەل، چانشەندورف، شتەينگرابەن، ەلتەندورفتى باسىپ الدى...
گەرمانيا. ماگدەبۋرگ اۋدانىندا 9- امەريكالىق اسكەرى ەلبا ارقىلى ءوتىپ، وڭ جاعالاۋىندا پلاتسدارم قۇردى. وڭتۇستىككە قاراي امەريكالىق اسكەر ەرفۋرت پەن ۆەيماردى جاۋلادى. سوڭعىسى اتىسسىز جەڭىلىسىن مويىندادى. گەرمانيانىڭ جوعارعى باسشىلىعى كەرى قايتقاندا كاسىپورنىدار، كوپىرلەر مەن بايلانىس قۇرالدارىن جويۋدى، ياعني «ورتەنگەن جەر» تاكتيكاسىن قولدانۋدى تالاپ ەتتى. ءوز اۋماعىندا دا...
ا ق ش. ۋورم- سپرينگستە (دجوردجيا شتاتى) ا ق ش پرەزيدەنتى فرانكلين دەلانو رۋزۆەلت قازا تاپتى. ونى العاش رەت پرەزيدەنت قىلىپ 1932 -جىلى سايلاعان. ول گيتلەرگە قارسى كواليتسيانىڭ نىعايۋىنا مول ۇلەسىن قوستى جانە بىرىككەن ۇلتتار ۇيىمىنىڭ قۇرىلۋىنا كوپ كوڭىل ءبولدى. ول قازا تاپقاننان 3 ساعات وتكەن سوڭ ا ق ش پرەزيدەنتى قىزمەتىن گارري ترۋمەن اتقارا باستادى.
قازا تابار الدىندا پرەزيدەنت رۋزۆەلت حالىق كوميسسارلارىنىڭ ءتوراعاسى ستالينگە حات جولداپ، وداقتاستىقتار اراسىنداعى سەنىمسىزدىكتەن اۋلاق بولۋعا شاقىردى. حاتتا: «ءبىزدىڭ اسكەرلەرىمىز گەرمانيادا بايلانىس ورناتىپ، ۇيلەسىپ شابۋىل جاساسا، فاشيستىك اسكەر قۇلايتىنىنا سەنىمدىمىن» دەلىنگەن. فرانكلين رۋزۆەلتتىڭ سوڭعى حاتى ماسكەۋگە پرەزيدەنت قازا تاپقان كۇننەن كەيىن كەلدى...
ءبىزدىڭ جەڭىسكە دەيىن 27 كۇن قالدى.
