بۋرابايدا ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ 27-وتىرىسى اشىلادى
وعان مەملەكەت باسشىسى نۇرسۇلتان نازاربايەۆ قاتىسادى.
وتىرىستا شەتەلدىك ينۆەستورلاردىڭ ق ر ۇدەمەلى يندۋستريالدىق-يننوۆاسيالىق دامۋ مەملەكەتتىك باعدارلاماسىنىڭ ەكىنشى بەسجىلدىعىن جۇزەگە اسىرۋعا قاتىسۋى ماسەلەسى تالقىلاناتىن بولادى.
تاقىرىپ بويىنشا نەگىزگى باياندامانى ق ر پرەمەر-ءمينيسترىنىڭ ورىنباسارى-يندۋستريا جانە جاڭا تەحنولوگيالار مينيسترى اسەت يسەكەشەۆ پەن ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتي جاسايدى دەر كۇتىلۋدە.
سونىمەن قاتار ازيا دامۋ بانكى، تابيعي رەسۋرستار جونىندەگى ەۋرازيا كورپوراسياسى، «Baker&McKenzie»، «سبەربانك»، «BG Group»، «لۋكويل»، « General Electric»، « Shel» جەتەكشىلەرى ءسوز سويلەيدى دەپ جوسپارلانىپ وتىر.
ءماجىلىس ەكى كۇنگە سوزىلادى.
كەشە ن. نازاربايەۆ شەتەلدىك ينۆەستورلار كەڭەسى قارساڭىندا «جەنەرال ەلەكتريك ويل ەند گاز» كومپانياسىنىڭ باس اتقارۋشى ديرەكتورى لورەنزو سيمونەلليمەن، «رەسەي سبەربانكى» ا ا ق باسقارما ءتوراعاسى گەرمان گرەفپەن، «گلەنكور ەكستراتانىڭ» باس اتقارۋشى ديرەكتورى ايۆان گلازەنبەرگپەن، «ەني» كومپانياسىنىڭ باس اتقارۋشى ديرەكتورى كلاۋديو دەسكالسيمەن جانە الداعى وتىرىسقا قاتىساتىن وزگە دە ادامدارمەن كەزدەستى.
سونداي-اق «قازاقستانىڭ 2010-2014 - جىلدارعا ارنالعان يندۋستريالدى باعدارلاماسىنداعى شەتەلدىك ينۆەستيسيالار» كورمەسىنە باردى.
