قاڭتار قاسىرەتى: 273 پوليتسيا قىزمەتكەرى مەن اسكەري قىزمەتشى مۇگەدەك بولىپ قالدى
بۇل تۋرالى ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«بۇعان دەيىن اتاپ وتكەندەي تارتىپسىزدىكتەر بارىسىندا 3 مىڭنان استام قۇقىق قورعاۋ ورگاندارى قىزمەتكەرلەرى جانە اسكەري قىزمەتشىلەر ءارتۇرلى دەنە جاراقاتتارىن الدى. ونىڭ ىشىندە اتىس جانە پىشاقتاۋ جاراقاتتارى، سونداي-اق باسقا دا اۋىر زارداپتار بار. قازىرگى ۋاقىتتا مەديتسينالىق مەكەمەلەردە جاپپاي تارتىپسىزدىكتەر بارىسىندا اۋىر جاراقات العان 273 قىزمەتكەر مەن اسكەري قىزمەتشى ەمدەلۋدە. ولاردىڭ ءبىر بولىگى وسى ۋاقىتقا دەيىن جان ساقتاۋ بولىمىندە. وكىنىشكە وراي ولار ارى قاراي جۇمىس جاساي المايدى، ءىس جۇزىندە مۇگەدەك بولىپ قالدى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، پوليتسيا قىزمەتكەرلەرى مەن اسكەريلەردى قاتىگەزدىكپەن ۇرىپ-سوعۋدىڭ، سونداي-اق اكىمشىلىك جانە وزگە عيماراتتارعا شابۋىل جاساۋدىڭ كادرلارى الەۋمەتتىك جەلىلەردە جەتكىلىكتى مولشەردە بار. ولاردىڭ كوپشىلىگىن تارتىپسىزدىكتەرگە قاتىسۋشىلاردىڭ وزدەرى تاراتتى.
«باسقا مالىمەتتەرمەن قاتار وسى بەينەجازبالار بويىنشا قىلمىستىق شابۋىلدارعا قاتىسقان ادامدار انىقتالۋدا. ماسەلەن، اتىراۋدا قالانىڭ ورتالىق كوشەلەرىنىڭ بىرىندە 5-قاڭتاردا وبلىستىق اكىمدىك عيماراتىن قورعاۋعا تارتىلعان پوليتسيا قىزمەتكەرلەرىن توپ بولىپ قاتىگەزدىكپەن ۇرىپ-سوققان وسى قالانىڭ ەكى تۇرعىنى ۇستالدى. بەينەدە كورىنىپ تۇرعانداي، شابۋىلداۋشىلار ءبىر قىزمەتكەردى جەرگە جاتقىزىپ، ونى تەۋىپ، تاياقپەن ۇرعان. ەكىنشىسىن اياقپەن، قولمەن، سونداي-اق كاسكامەن باسىنان ۇرىپ، اۋىر زاقىم كەلتىرگەن. سول قالادا تارتىپسىزدىككە قاتىسۋشىلار جەدەل جاردەم اۆتوماشيناسىن بۇعاتتاپ، اۋرۋحاناعا جەتكىزىلىپ بارا جاتقان جاراقاتتانعان پوليتسيا قىزمەتكەرلەرىن قايتا ۇرىپ-سوققان. وسى فاكتىلەر بويىنشا اتىراۋ قالاسىنىڭ ءتورت تۇرعىنى انىقتالدى، ولار سوتتىڭ سانكتسياسىنان قاماۋعا الىندى»، - دەدى دەپارتامەنتى باستىعى.
سانجار ءادىلوۆتىڭ دەرەگىنشە، قىزىلوردادا 5- قاڭتاردا اسكەريلەردەن تارتىپ الىنعان «كاماز» ارنايى اۆتوماشيناسىن قوعامدىق ءتارتىپتى قورعاۋدى قامتاماسىز ەتكەن قىزمەتكەرلەر تىزبەگىن باسىپ وتۋگە باعىتتاعان وسى قالانىڭ تۇرعىنى ۇستالدى. كولىكپەن باسىپ كەتۋدىڭ ناتيجەسىندە ۇلتتىق ۇلاننىڭ 19 جاسار اسكەري قىزمەتشىسى وقيعا ورنىندا كوز جۇمدى.
«اتا-اناسى جالعىز ۇلىنان ايرىلدى، ءتىرى كۇنىندە ول باعدارلاما جاساۋمەن اينالىسۋشى ەدى جانە فيلوسوفيامەن اۋەستەنگەن. قاراعاندى مەملەكەتتىك تەحنيكالىق ۋنيۆەرسيتەتىندە وقىدى. ومىرگە ۇلكەن جوسپارلار جاساپ، IT - مامانى بولۋدى ارمانداعان ەدى»، - دەدى ول.
«سول كۇنى وسى قالانىڭ تاعى ءبىر شابۋىلشىسى اسكەريلەردەن باسقا «كاماز» اۆتوماشيناسىن تارتىپ الىپ، جەدەل باسقارۋ ورتالىعىنىڭ جۇمىسىنا كەدەرگى جاساۋ ماقساتىندا ەلەكتر باعانىن قاساقانا سوعىپ، بەينەباقىلاۋ كامەرالارىن ىستەن شىعاردى. ودان سوڭ جەرگىلىكتى پوليتسيا قىزمەتىنىڭ عيماراتىن باسىپ الۋ ماقساتىندا قورشاۋدىڭ قاقپاسىن سوقتى. ەكى وقيعا بويىنشا دا كۇدىكتىلەر سوت سانكتسياسىمەن قاماۋعا الىندى، بەينەجازبالار ولاردىڭ كىناسىن دالەلدەيدى»، - دەدى دەپارتامەنت باستىعى.
ونىڭ اتاپ وتۋىنشە، وسىعان ۇقساس فاكتىلەر ەلىمىزدىڭ ءبىرقاتار وڭىرىندە، اسىرەسە الماتىدا ورىن الدى.
«مىسالى، وسى قالادا جاپپاي تارتىپسىزدىكتەر بارىسىندا قىزمەتكەرلەرگە دەنە جاراقاتتارىن كەلتىرۋ ءۇشىن مەتال كەسىندىلەرىن ازىرلەپ، قالانىڭ كوشەلەرىندە «گازەل» اۆتوماشيناسىمەن ءجۇرىپ، ولاردى نارازىلىق بىلدىرۋشىلەرگە تاراتقان التى ادام ۇستالدى»، - دەدى سانجار ءادىلوۆ.
