بيىل بەكەت اتانىڭ تۋعانىنا 270 جىل تولادى

اقتاۋ. قازاقپارات - بيىل بەكەت اتانىڭ 270 جىلدىق مەرەيتويى اتاپ وتىلەدى. تاريحي ورىندى كوگالداندىرۋ جۇمىستارى جۇرگىزىلىپ، 200 كوشەت وتىرعىزىلماق، دەپ حابارلايدى قازاقپارات ءتىلشىسى.

بەكەت مىرزاعۇل ۇلى 1750-1813-جىلدار ارالىعىندا ءومىر سۇرگەن. جاستايىنان سىرت جاۋعا قارسى سوعىستا ەرلىك تانىتقان ول سونداي-اق باتىر، ساۋلەتشى، اعارتۋشى، اۋليە كىسى رەتىندە تانىلعان.

اۋليە تۋرالى اڭىز-اڭگىمەلەر مەن تىلسىم وقيعالار كوپ. سولاردىڭ بىرىندە بەكەتتىڭ 13 جاسىندا ءبىلىم قۋىپ حيۋاعا بارىپ، شەرعازى مەدرەسەسىندە پاقىرجان قاجى دەگەن بەلگىلى ۇستازدان 7 جىل ءدارىس الىپ، كەيىن ەلگە ورالعانى، يسلامدى ۋاعىزداپ، شاكىرت تاربيەلەگەنى جايىندا ايتىلادى.

سونداي-اق، قازىرگى كۇنى ءپىر بەكەت سالدى دەگەن بىرنەشە مەشىت بەلگىلى. پايعامبار جاسىندا ومىردەن وتكەن اۋليە ءوزى سالعان وعلاندىداعى مەشىتكە جەرلەنگەن.

بۇل مەشىت سايدا ورنالاسقاندىقتان، وعان كولىك جەتە المايدى. سوندىقتان زيارات ەتۋشىلەرگە جالعىز اياق جولمەن ەكى شاقىرىمداي جەردى جاياۋ ءجۇرىپ وتۋگە تۋرا كەلەدى.

جولاي جالعىز قالىپ، ويلانىپ، تابيعاتتىڭ اسەم كورىنىستەرىنە ءسۇيسىنۋ مۇمكىندىگى دە جوق ەمەس. مۇندا ارقارلار كوپتەپ كەزدەسەدى دەيدى جەرگىلىكتى جۇرت.