قوستاناي وبلىسىندا 27,9 مىڭ گا جايىلىم مەملەكەت مەنشىگىنە قايتارىلدى
ايماقتاعى كوشپەلى كەڭەس قورىتىندىسى بويىنشا 27,9 مىڭ گا جايىلىم جەر مەملەكەت مەنشىگىنە قايتارىلدى، دەپ حابارلايدى قازاقپارات پارتيانىڭ باسپا ءسوز قىزمەتىنە سىلتەمە جاساپ.
اتاپ ايتقاندا، فەدوروۆ اۋدانىندا - 7,1 مىڭ گا، ناۋىرزىم اۋدانىندا - 20,8 مىڭ گا قايتارىلىپ، مەڭدىقارا اۋدانىندا ءىرى شارۋا قوجالىقتارىنىڭ بىرىمەن 3,4 مىڭ گا جەردى كوپشىلىكتىڭ قولدانىسى ءۇشىن وتەۋسىز بەرۋ تۋرالى مەموراندۋم جاسالعان.
«ءبىزدىڭ كوميسسيانىڭ باستى ماقساتى - پايدالانىلماي جاتقان، ونىڭ ىشىندە زاڭسىز جەكە مەنشىككە ءوتىپ كەتكەن جايىلىمداردى قايتارۋ جانە ولاردى اۋىل تۇرعىندارى ءۇشىن قولجەتىمدى ەتۋ. جىل باسىنان بەرى قوستاناي وبلىسىندا 60 مىڭ گا پايدالانىلماي جاتقان جەر قايتارىلدى. سونىمەن قاتار، جالپى اۋدانى 45,4 مىڭ گا بولاتىن 24 جەر ۋچاسكەسىن قايتارۋ ماسەلەسى بۇگىندە سوت وندىرىسىندە. جالپى، «جەر اماناتى» كوميسسياسىنىڭ جۇمىسى 267 مىڭ گا جەردى مەملەكەت مەنشىككە قايتارۋعا كومەكتەستى»، - دەيدى پارتيا حاتشىسى داۋلەت كارىبەك.
كەيىنگى بىرنەشە اي ىشىندە كوميسسيا مۇشەلەرى جەتىسۋ، قاراعاندى، جامبىل، تۇركىستان جانە اقتوبە وبلىستارىندا بولدى. جەر كوميسسياسىنىڭ قۇرامىنا پارلامەنت ماجىلىسىنە «AMANAT» پارتياسىنان سايلانعان دەپۋتاتتار ايدوس سارىم، ەرلان سايروۆ، جاناربەك ءاشىمجان، قاينار اباسوۆ، ارتۋر پلاتونوۆ جانە تاۋەلسىز ساراپشىلار مەن قوعام قايراتكەرلەرى باقىتجان بازاربەك، مارات ءباشىموۆ، كيريلل پاۆلوۆ، مارات شيبۇتوۆ، ماقسات تولىقباي تاعى باسقالار كىرەدى. ايتا كەتسەك، جەر ماسەلەلەرىن نەعۇرلىم جەدەل شەشۋ ءۇشىن قازاقستاندىقتار بارلىق زاڭ بۇزۋ فاكتىلەرى تۋرالى «AMANAT» پارتياسىنىڭ «جەدەل جەلى» 88000804441 تەلەفونىنا حابارلاي الادى. وتىنىمدەر WhatsApp ارقىلى دا 77008004441 قابىلدانادى.
