ەلوردالىق 27 مىڭ جۇرگىزۋشىنىڭ 1 ميلليارد تەڭگەدەن استام ايىپپۇل بەرەشەگى بار

استانا. قازاقپارات - استانادا 27229 مىڭ كولىك جۇرگىزۋشىسىنىڭ 1 ميلليارد تەڭگەدەن استام ايىپپۇل بەرەشەگى بار، دەپ حابارلايدى قازاقپارات ءتىلشىسى.

«ىشكى ىستەر ءمينيسترىنىڭ تاپسىرماسىمەن پاترۋلدىك پوليتسيا قىزمەتكەرلەرىنىڭ پلانشەتتەرگە «سەرگەك» بەينەكامەرالارىمەن بىرىكتىرىلگەن «قورعاۋ» جۇيەسى قوسىمشاسى ازىرلەندى. «قورعاۋ» ەنگىزىلگەننەن بەرى جالعان مەملەكەتتىك جۇرگىزۋشى كۋالىگى بار 101 جۇرگىزۋشى انىقتالدى. سونىمەن قاتار كولىك باسقارۋ قۇقىعىنان ايىرىلعان 1296 ادام ۇستالدى. 903 كولىك ايىپتۇراققا قويىلدى. 27229 مىڭ جۇرگىزۋشىگە 1 ميلليارد تەڭگەدەن استام ايىپپۇل بەرەشەگى بار ەكەنى حابارلاندى»، - دەدى استانا قالالىق اكىمشىلىك پوليتسيا باسقارماسىنىڭ ءبولىم باسشىسى باۋىرجان توعجۇمانوۆ ب ا ق وكىلدەرىنىڭ قاتىسۋىمەن وتكەن بريفينگىدە.

سونىمەن بىرگە ول جىل باسىنان ەلوردا اۋماعىندا 110 جول- كولىك وقيعاسى تىركەلىپ، سالدارىنان 6 ادام قازا تاپقانىن ايتتى. بۇعان قوسا، 123 ادام ءارتۇرلى دەنە جاراقاتىن العان.

باۋىرجان توعجۇمانوۆتىڭ دەرەگىنشە، بيىل استانادا جول ەرەجەسىن ساقتاماۋدىڭ 94044 فاكتىسى انىقتالىپ، 729 ميلليون تەڭگەدەن استام سوماعا ايىپپۇل سالىندى.