قازاقستان 26 ەلمەن ۆيزاسىز رەجيم ەنگىزۋ جونىندە كەلىسىپ جاتىر

استانا. قازاقپارات - قازاقستان اۆستريا، ساۋد ارابياسى، سان-مارينو، باحرەين سياقتى، جالپى 26 ەلمەن ءوزارا ۆيزاسىز رەجيم ەنگىزۋ جونىندە كەلىسسوزدەر جۇرگىزىپ جاتىر، دەپ حابارلايدى قازاقپارات.

مادەنيەت جانە سپورت مينيسترلىگىنىڭ مالىمەتىنشە، «قازاقستانعا شاقىرۋ» تۋرالى تالاپتىڭ كۇشىن جويۋ جانە ازاماتتارى ەلەكتروندى ۆيزا راسىمدەي الاتىن ەلدەردىڭ تىزبەسىن كەڭەيتۋ قاراستىرىلادى.

بۇدان بولەك، ب ا ءا ازاماتتارى ءۇشىن ۆيزانى جەڭىلدەتىلگەن تۇردە بەرۋ ماسەلەسى تالقىلانىپ جاتىر.

«شەتەلدىك ساياحاتشىلاردىڭ قازاقستانعا قىزىعۋشىلىعى جوعارى. سول سەبەپتى ءبىز ەلىمىزدىڭ تۋريستىك الەۋەتىن تولىق اشۋ ءۇشىن جۇيەلى تۇردە جۇمىس ىستەپ جاتىرمىز. ونىڭ ىشىندە كەلۋشى تۋريستەر اعىنىن ۇلعايتۋ ماقساتىنداعى ءىس-شارالار بار. سونىمەن قاتار ءبىز كوشى-قوندى باقىلاۋدى جاقسارتۋعا مۇمكىندىك بەرەتىن تەتىكتەردى ىسكە اسىرىپ وتىرمىز. سونىڭ ءبىرى eQonaq اقپاراتتىق جۇيەسى»، - دەدى ق ر مادەنيەت جانە سپورت مينيسترلىگىنىڭ رەسمي وكىلى ءمولدىر ابدۋاليەۆا.