قازاقستاندا ءولىم-ءجىتىم 26 پايىزعا ازايدى
ەلىمىزدە ءولىم-ءجىتىم كورسەتكىشى پاندەمياعا دەيىنگى دەڭگەيگە ورالدى. بىلتىر ەلىمىزدە 134,7 مىڭ ادام قايتىس بولدى، بۇل - 2021-جىلمەن سالىستىرعاندا تورتتەن بىرگە از. وتكەن جىلى ءولىم-ءجىتىمنىڭ جالپى كوەففيتسيەنتى پاندەمياعا دەيىنگى كەزەڭنەن تومەندەدى.
پاندەميا كەزىندە (2020-2021 ج. ج.) ءولىم-ءجىتىم شامادان تىس تىركەلىپ، كورسەتكىش الدىڭعى جىلدارعا قاراعاندا كۇرت ارتتى. قايتىس بولعانداردىڭ جالپى سانى 2020 -جىلى 21,2 پايىز، 2021-جىلى 37 پايىزعا ارتقان. ايتا كەتەرلىگى، ءولىم-ءجىتىمنىڭ بارلىعى تىكەلەي COVID-19 ينفەكسياسىمەن بايلانىستى ەمەس. وتكەن جىلى كوبىنە قان اينالىمى جۇيەسى اۋرۋلارىنا شالدىعۋدىڭ سوڭى ولىمگە الىپ كەلگەن. ەكىنشى ورىندا - قاتەرلى ىسىك جانە سوعان ۇقساس دەرتتەر. ال، تىنىس الۋ ورگاندارىنىڭ اۋرۋلارى ءۇشىنشى ورىندا.
ۇلتتىق ستاتيستيكا بيۋروسىنىڭ دەرەكتەرىندە حالىقارالىق جىكتەمە بويىنشا اۋرۋلاردىڭ ءىرى توپتارى عانا قامتىلعان. ولاردىڭ قاتارىنا قازاقستانداعى بارلىق ءولىم- ءجىتىمنىڭ شامامەن 60 پايىزى كىرەدى. قالعان سەبەپتەر، ياعني 40,1 پايىز نەمەسە 54 مىڭ جاعداي رەسمي ستاتيستيكادا ناقتىلانباعان.
2022-جىلى جۇرەك جانە قان اينالىمى اۋرۋلارىنان قايتىس بولعاندار سانى باسقا اۋرۋلارعا قاراعاندا تومەندەگەن. وسىلايشا، ەلىمىزدە ينفاركت، ينسۋلت جانە جۇرەك-قان تامىرلارى جۇيەسى پروبلەماسىمەن قايتىس بولعاندار سانى 13 مىڭ ادامعا ازايعان.
پاندەميادان كەيىن تىنىس الۋ ورگاندارى اۋرۋلارىنان بولاتىن ءولىم-ءجىتىم كورسەتكىشى 7,7 مىڭ جاعدايعا نەمەسە 36,9 پايىزعا ازايعان. وتكەن جىلى قايتىس بولعان قازاقستاندىقتار سانى 2019-جىلعىدان ازايدى. بيىل قاڭتاردا دەنساۋلىق ساقتاۋ ءمينيسترى اجار عينيات ءولىم-ءجىتىم بويىنشا وتكەن جىلعى ستاتيستيكانى كەلتىرگەن بولاتىن.
«بىلتىر حالىققا مەديتسينالىق كومەك كورسەتۋدىڭ تيىمدىلىگىن ارتتىرۋ بويىنشا كەشەندى جۇمىس جۇرگىزىلدى. ناتيجەسىندە دەنساۋلىق ساقتاۋدىڭ نەگىزگى مەديتسينالىق-دەموگرافيالىق كورسەتكىشتەرىنىڭ وڭ ديناميكاسى بايقالادى»، - دەگەن بولاتىن ا. عينيات.
مەملەكەتتىك بيۋجەتتەن اۋرۋحانالارعا بولىنگەن قارجىعا قاراعاندا، مەديتسينالىق قىزمەتتەر مەن ونىڭ تيىمدىلىگىن ارتتىرۋعا كوپ قاراجات قارالعان. كورسەتىلگەن قىزمەتتەر سانىنىڭ ءوسۋى مەديتسينالىق مەكەمەلەردىڭ قارجىلىق كورسەتكىشىنە اسەر ەتەدى. مەملەكەتتىڭ مەديتسينالىق مەكەمەلەرگە 2021-2022-جىلدارى تولەگەن قاراجاتتىڭ جالپى كولەمىن سالىستىرساق، ايىرماشىلىق وتە از (2,3+ پايىز).
قارجى بويىنشا 2021-جىلى اۋرۋحانالار قىزمەت كورسەتكەنى ءۇشىن مەملەكەتتەن 1,98 تريلليون تەڭگە، ال بىلتىر 2,02 تريلليون تەڭگە الدى. ايىرماشىلىق - 44 ميلليارد تەڭگە.
دۇنيەجۇزىلىك دەنساۋلىق ساقتاۋ ۇيىمى ساراپشىلارىنىڭ پىكىرىنشە، پاندەميا كەزىندە ءولىم-ءجىتىمنىڭ كوبەيۋىنە اسەر ەتكەن تاعى ءبىر سەبەپ - اۋرۋحانالار مەن ەمحانالاردا پاتسيەنتتەردىڭ شامادان تىس بولۋى. سالدارىنان ەم الۋ قولجەتىمسىز بولدى.
