نۇرسۇلتان نازاربايەۆ كونستيتۋتسيانىڭ 26-بابىن ەسكى رەداكسيادا قالدىرۋدى ۇسىندى

استانا. قازاقپارات - بيلىك تارماقتارى اراسىنداعى وكىلەتتىكتى قايتا ءبولۋ جونىندەگى جۇمىس توبىنىڭ وتىرىسىندا نۇرسۇلتان نازاربايەۆ ق ر كونستيتۋتسياسىنىڭ 26-بابىن ەسكى رەداكسيادا قالدىرۋدى ۇسىندى.

 بۇل تۋرالى اقوردانىڭ تۆيتتەردەگى پاراقشاسىندا حابارلادى.

ايتا كەتەيىك، اتا زاڭىمىزدىڭ 26-بابىنداعى «قازاقستان رەسپۋبليكاسىنىڭ ازاماتتارى زاڭدى تۇردە العان قانداي دا بولسىن مۇلكىن جەكە مەنشىگىندە ۇستاي الادى» دەگەن سويلەمدەگى «ازاماتتارى» دەگەن ءسوزدى «اركىممەن» الماستىرۋ ۇسىنىلعان بولاتىن. بۇل قوعامدا قىزۋ تالقىعا ءتۇستى. اتاپ ايتقاندا، قازاقستاندىقتار شەتەل ازاماتتارى وسى نورمانى پايدالانىپ، جەردى جەكەمەنشىككە ساتىپ الۋى مۇمكىن ەكەندىگىنە الاڭداۋشىلىق ءبىلدىردى.

 ەسكە سالا كەتەيىك، بۇگىن اقوردادا وتكەن بيلىك تارماقتارى اراسىنداعى وكىلەتتىكتەردى قايتا ءبولۋ جونىندەگى جۇمىس توبىنىڭ كەزەكتى وتىرىسىندا ەلباسى نۇرسۇلتان نازاربايەۆ قازاقستان كونستيتۋتسياسىنىڭ 23 - بابىنا وزگەرىستەر ەنگىزىلەتىنى تۋرالى ءمالىم ەتكەن ەدى.