استانا قالاسىنىڭ 26 جاستاعى تۇرعىنى الماتى مارافونىنىڭ جەڭىمپازى اتاندى

الماتى. قازاقپارات - استانا قالاسىنىڭ 26 جاستاعى تۇرعىنى ايدىن قاسەن الماتى مارافونىنىڭ جەڭىمپازى اتاندى. ونىڭ كورسەتكىشى 2 ساعات 42 مينۋت.

جۋرناليستەرگە بەرگەن سۇحباتىندا ول الماتى مارافونىنا ءبىرىنشى رەت قاتىسىپ وتىرعاندىعىن جەتكىزدى.

«بۇگىن الماتىدا اۋا رايى وتە جاقسى بولدى. ال، الماتى مارافونى وتە تارتىستى ءوتتى. بۇل مارافوننىڭ ءوز ەرەكشەلىكتەرى بار. جۇگىرەتىن جولداردىڭ كوپ بولىگى دوڭەس بولىپ كەلەدى. ەگەر ءتۇزۋ بولسا، ونى 2 ساعات 20 مينۋتتا جۇگىرىپ وتۋگە بولادى دەپ ويلايمىن. ال مەنىڭ كورسەتكشىم - ازىرگە 2 ساعات 42 مينۋت بولدى. سەكۋندىنا دەيىنگى ءدال ۋاقىتى ءسال كەيىنىرەك ناقتىلانىپ، جاريا ەتىلەدى»، - دەدى ا. قاسەن.

سونىمەن قاتار، ايدىن بۇل جارىسقا ءبىر ايدان استام ۋاقىت دايىندالعاندىعىن ايتتى.

«مەن كۇندەلىكتى جۇگىرىپ تۇرامىن. ال مارافونعا ناۋرىز ايىنىڭ باسىندا قىزۋ دايىندالا باستادىم. تاڭەرتەڭ جانە كەشكى ۋاقىتتاردا 10-20 شاقىرىمداي جۇگىرىپ وتىردىم. اپتالىق قاشىقتىق - 70-80 شاقىرىمدى قۇراپ وتىردى. نەگىزىنەن استاناداعى ورتالىق ساياباقتا دايىندالىپ ءجۇردىم. ءوزىم BI Group كومپانياسىنىڭ ديزاينەرى بولىپ قىزمەت اتقارامىن»، - دەدى ايدىن قاسەن.

ايتا كەتەلىك، ول بۇعان دەيىن 2011 -جىلى بەيجىڭ مارافونىنا قاتىسىپ، التىنشى ورىن، 2012 -جىلى قىتايدىڭ داليان قالاسىنىڭ حالىقارالىق مارافونىنا قاتىسىپ، 8- ورىن العان ەكەن. الداعى ۋاقىتتا جەڭىل اتلەتيكا بويىنشا ق ر ۇلتتىق قۇرامىنا ەنۋ ويىندا بار.

اۆتور: ايبوتا جاپپاربەرگەن