راديكالدى ءدىننىڭ بۇعاۋىنا ىلىككەن 26 ەلوردالىق سيريادا ءجۇر
بۇل تۋرالى بۇگىن «دىندەردى زەرتتەۋ ورتالىعى قاۋىمداستىعى» زاڭدى تۇلعالار بىرلەستىگىنىڭ ديرەكتورى يۋليا دەنيسەنكو ءمالىم ەتتى.
ونىڭ اتاپ وتۋىنشە، تەك استانانىڭ وزىندە سوڭعى جىلدارى راديكالدى ءدىننىڭ يدەولوگياسىن ۇستاناتىن قالالىقتاردىڭ سانى 3 ەسەگە ارتىپ، 300 دەن 935 ادامعا جەتكەن.
«ەميگرانتتار سانىنىڭ مول ەكەندىگىن دە ەستەن شىعارۋعا بولمايدى. ماسەلەن، قازىرگى ۋاقىتتا ەلوردانىڭ 26-ى تۇرعىنى سيريادا ءجۇر. ولاردىڭ باسىم بولىگى، ياعني 15 ايەلدەر. ءدال وسىنداي كولەمدە شەكارادان شىقپاق بولعانداردىڭ جولىن قۇقىق قورعاۋ ورگاندارى كەسكەن بولاتىن»، - دەدى يۋ. دەنيسەنكو.
وسى رەتتە ول ناقتى مىسال دا كەلتىرىپ ءوتتى. ونىڭ ايتۋىنشا، استانانىڭ تۇرعىلىقتى ازاماتتارىنىڭ ءبىرى ايەلى مەن 2 بالاسىن الىپ سيرياعا اتتانعان. ارادا 7 اي وتكەندە اتالعان ەلدەگى قالالاردىڭ بىرىندە وتكەن سوعىس بارىسىندا ول وققا ۇشقان.
«بۇل جايىندا ونىڭ ايەلى قۇربىسىنا حابارلاسىپ ايتىپتى. سونىمەن قاتار ول ءوزىن زورلىقپەن باسقا بىرەۋگە تۇرمىسقا شىعارعالى جاتقانىن جەتكىزگەن. وسىدان كەيىن بۇقارالىق اقپارات قۇرالدارىندا سودىرلارعا جىنىستىق قىزمەت كورسەتۋدەن باس تارتقانى ءۇشىن 150 ايەلدىڭ اتىلعاندىعى تۋرالى اقپارات تارادى. ءبىزدىڭ ازاماتشامىز، استانانىڭ بۇرىنعى تۇرعىنى دا حابار- وشارسىز كەتتى. ونىڭ بالالارىنىڭ دا قاي جەردە ەكەندىگى بەلگىسىز»، - دەيدى بىرلەستىك ديرەكتورى.
اۆتور: مارلان جيەمباي
