قازاقستان ۆيزاسىز ءتارتىپ ەنگىزىلگەن ەلدەردىڭ سانىن 26 عا جەتكىزبەك
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ۇلتتىق كاسىپكەرلەر پالاتاسى باسقارماسى ءتوراعاسىنىڭ ورىنباسارى گۇلنار قۇربانبايەۆا ءمالىم ەتتى، دەپ حابارلايدى BNews.kz تىلشىسى.
«بۇگىنگى تاڭدا سىرتقى ىستەر مينيسترلىگى، ىشكى ىستەر مينيسترلىگى، ۇلتتىق قاۋىپسىزدىك كوميتەتى، ينۆەستيتسيالار جانە دامۋ مينيسترلىگى جانە ۇلتتىق كاسىپكەرلەر پالاتاسى بۇعان دەيىن ۆيزاسىز رەجيم ەنگىزىلگەن 10 ەلدى قوسا العاندا، ولاردىڭ سانىن 26 عا جەتكىزۋ ماسەلەسىن قاراستىرىپ جاتىر. بۇل قادام ەكسپو-2017 كورمەسىندە كومەكتەسەدى دەگەن ۇمىتتەمىز»، - دەدى گ. قۇربانبايەۆا.
«بۇل ماسەلە وتە ماڭىزدى، سوندىقتان ونىڭ شەشىلۋى جەدەلدەتىلسە دەيمىز. جازعا قاراي ءبىزدىڭ قولىمىزدا ەلىمىزگە ۆيزاسىز كەلۋگە مۇمكىندىك بەرەتىن جاڭا نورماتيۆتىك-قۇقىقتىق اكت بولادى دەگەن ۇمىتتەمىز»، - دەپ قوستى گ. قۇربانبايەۆا.
ايىمگۇل ابىلەۆا
