ارىس قالاسىندا 2680 ءۇيدىڭ جوندەۋ جۇمىستارى اياقتالدى
بۇگىنگى تاڭدا زاقىمدانعان جانە جارامسىز دەپ تانىلعان 7611 ءۇيدىڭ 4641 ىندە جوندەۋ جۇمىستارى ءوز ۋاقىتىمەن ءجۇرىپ جاتىر.
ونىڭ ورىندالۋى 60,05 پايىزعا جەتكەن. ال بىتكەن ۇيلەر سانى 2680, ياعني 35,41 پايىزدى قۇرايدى، دەپ حابارلايدى قازاقپارات تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
جالپى، 17 سەكتورداعى ءار وبلىس وزدەرىنە بەرىلگەن مەرزىمدە قولعا الىنعان شارۋانى اياقتاۋعا جاقىنداپ قالعان.
بۇدان بولەك، توتەنشە جاعدايدان زارداپ شەككەن ارىس تۇرعىندارىنا 100 مىڭ تەڭگە وتەماقى تولەۋ ءۇشىن 63464 ادامنان ءوتىنىش قابىلدانعان. قالادا الەۋمەتتىك جانە كاسىپكەرلىك نىساندار جۇمىس ىستەۋدە. جالپى شاھاردا 66 الەۋمەتتىك نىسان بويىنشا جوندەۋ جۇمىستارى جالعاسىپ كەلەدى، ونىڭ ىشىندە 4 ەۋى باسىنان سالىنادى. وسى باعىتتاعى جۇمىستارعا 1788 جۇمىسشى، 30 عا جۋىق قۇرىلىس كومپانيا جۇمىلدىرىلعان. بۇگىنگى تاڭدا ارىس قالاسىنداعى قۇرىلىس- جوندەۋ جۇمىستارىندا وبلىس، قالالاردان 7699، وبلىس اۋداندارىنان 315 ادام جۇمىس ىستەۋدە.
ايتا كەتۋ كەرەك، تۇركىستان وبلىسىنىڭ اكىمى ءومىرزاق شوكەيەۆ وبلىستىق شتاب ءاربىر سەكتورعا جاۋاپتى وبلىس پەن اۋدان اكىمدىكتەرىمەن بىرلەسىپ، تۇرعىنداردىڭ ارىز- شاعىمى بويىنشا جۇيەلى جۇمىس اتقارىلۋى ءتيىس ەكەنىن ايتقان بولاتىن. بەرىلگەن تاپسىرماعا وراي ارىس قالاسىندا قۇرىلىس جۇمىستارى تولىق باقىلاۋعا الىنعان.
