تەڭىز دەڭگەيىنەن 2625 مەتر بيىكتىكتە قوي قىرقۋدان جارىس ءوتتى
نۇر-سۇلتان. قازاقپارات - تۇركيانىڭ وڭتۇستىك-شىعىسىندا ورنالاسقان شيرناك پروۆينتسياسىنىڭ فاراشين جايىلىمىندا قوي قىرقۋدان جارىس ءوتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.
تەڭىز دەڭگەيىنەن 2625 مەتر بيىكتىكتە وتكەن شاراعا جان-جاقتان تۋريستەر اعىلدى.
فەستيۆالدى ەلدىڭ مادەنيەت جانە تۋريزم ءمينيسترى احمەت حالۋك دۋرسۋن اشتى. ونىڭ ايتۋىنشا، تۇركيانىڭ وڭتۇستىك- شىعىسىنداعى قاۋىپسىزدىكتى قامتاماسىز ەتۋ وڭىردەگى اۋىل شارۋاشىلىعىن دامىتۋعا جانە تۋريستەردى كوبىرەك تارتۋعا جاعداي جاسايدى.
شيرناك گۋبەرناتورى مەحمەت اكتاشتىڭ سوزىنە قاراعاندا، اۋىل شارۋاشىلىعى - ءوڭىر ەكونوميكاسىنىڭ وزەگى.
«قوي قىرقۋ» فەستيۆالى - تۇركيانىڭ وڭتۇستىك- شىعىسىنداعى داستۇرلەر مەن مادەنيەتتىڭ كورىنىسى، دوستىق پەن ىنتىماقتىڭ سيمۆولى»، - دەدى اكتاش.
ايتا كەتەيىك، تۇركيا وڭتۇستىك- شىعىسىندا سيريامەن جانە يراكپەن شەكتەسەدى.