تۇركياداعى ءزىلزالا: 261 ساعات وتكەندە ءۇيىندى استىنان ەكى ادام امان تابىلدى

انتاكياداعى ورداباشى كوشەسىندە جۇمىس ىستەپ جاتقان قۇتقارۋ بريگاداسى قيراعان ءۇيدىڭ تاستارىنىڭ اراسىندا قىسىلىپ قالعان ەكى ازاماتتى امان الىپ قالدى.

ولار دەرەۋ 26 جاستاعى مەحمەت ءالي شاكيروعلى مەن 34 جاستاعى مۇستافا اۆچيدى شىعارىپ الدى. ەكى ازامات كاحرامانماراشتاعى ءزىلزالادان 261 ساعات وتكەننەن كەيىن قۇتقارىلدى.

ولارعا العاشقى مەديتسينالىق كومەك كورسەتىلىپ، اۋرۋحاناعا جەتكىزىلدى.

6 -اقپاندا ەپيتسەنترى كاحرامانماراشتا بولعان، ماگنيتۋداسى 7 بالدان اسقان ەكى جەر سىلكىنىسى تىركەلدى. ارتىنشا جۇزدەگەن افتەرشوكقا جالعاسقان جەراستى ءدۇمپۋى ەلدىڭ 10 پروۆينتسياسىندا، سونداي- اق كورشىلەس مەملەكەتتەردە، ونىڭ ىشىندە سيريادا دا سەزىلدى.

پرەزيدەنت رەجەپ تايىپ ەردوعان تۇركيادا جەتى كۇن جالپىۇلتتىق ازا تۇتۋ كۇنىن جاريالادى. جويقىن ءزىلزالا سالدارىنان مەرت بولعاندار سانى 36,1 مىڭ ادامنان استى.

فوتو: aa.com.tr

اۆتور

بالنۇر قوجاگەلدى