ءتورت جىلدا 260 مىڭ كولىكتى جالعان تەحنيكالىق بايقاۋدان وتكىزگەن توپ ۇستالدى - ۆيدەو
نۇر-سۇلتان. قازاقپارات - سىبايلاس جەمقورلىققا قارسى قىزمەت 260 مىڭ كولىكتى تەحنيكالىق بايقاۋدان زاڭسىز وتكىزدى دەگەن كۇدىكپەن 30 ادامنىڭ ۇستىنەن تەرگەۋ جۇرگىزىپ جاتىر، دەپ حابارلايدى قازاقپارات ءتىلشىسى.
بۇل تۋرالى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ كومەكشىسى شىڭعىس الەكەشيەۆ ايتتى.
«سىبايلاس جەمقورلىققا قارسى قىزمەت كولىكتىك باقىلاۋ سالاسىنداعى ۇيىمداسقان قىلمىستىق توپتىڭ قىزمەتىن اشكەرەلەدى. قىلمىستىق توپ مۇشەلەرى كوپ جىل بويى ەلىمىزدىڭ 5 وڭىرىندە اۆتوكولىكتەردى جالعان تەحنيكالىق بايقاۋدان وتكىزۋمەن اينالىسقان. ەلوردانىڭ كولىكتىك باقىلاۋ ينسپەكتسياسىنىڭ بۇرىنعى باستىعى باستاعان جالپى قاتىسى بار 30 ادام انىقتالدى. ينسپەكتسيانىڭ بۇرىنعى باستىعى سوت شەشىمىمەن قاماۋعا الىندى. جاساندى تەحنيكالىق بايقاۋلار جالعان تۇلعالار ارقىلى جۇرگىزىلگەن. ولاردىڭ اتىنا 28 فيرما راسىمدەلگەن. بۇل رەتتە اتالعان فيرمالاردا نە ءتيىستى عيمارات، نە تەحنيكالىق جابدىقتار، نە ماماندار دا بولماعان»، - دەيدى اگەنتتىك وكىلى.
ونىڭ مالىمەتى بويىنشا، كۇدىكتى توپ مۇشەلەرى 2017-جىلدان بەرى كولىكتەردى ناقتى تەكسەرمەي، 260 مىڭنان استام دياگنوستيكالىق كارتا جاساعان.
«زاڭسىز پايدا سوماسى جارتى ميلليارد تەڭگەدەن اسىپ وتىر. قازىر تەرگەۋ امالدارى ءجۇرىپ جاتىر. بارشا كاسىپكەرلەرگە، اۆتوكولىك يەلەرىنە جانە جۇرگىزۋشىلەرگە ايتارىمىز، وسىنداي الاياقتاردىڭ قىزمەتىنە جۇگىنۋ ارقىلى، ياعني، اۆتوكولىكتەردى تەحنيكالىق بايقاۋدان وتكىزبەۋ ارقىلى سىزدەر ءوزىڭىزدىڭ عانا ەمەس، باسقالاردىڭ دا ومىرىنە قاۋىپ توندىرەسىزدەر. سونىمەن قاتار، جالعان قۇجاتتى پايدالانعانى ءۇشىن قىلمىستىق جاۋاپكەرشىلىكتىڭ بار ەكەنىن ەسكەرتەمىز»، - دەيدى شىڭعىس الەكەشيەۆ.
