ءتورتىنشى رەت جالاۋىن كوتەرەتىن «جاس بارىس» تۋرنيرىندە 260 پالۋان باق سىناسادى

استانا. قازاقپارات - قاراشانىڭ 4-7- كۇندەرى قازاق كۇرەسىنەن «جاس بارىس» رەسپۋبليكالىق تۋرنيرى ءتورتىنشى رەت جالاۋىن كوتەرەدى.

ورالدا وتەتىن جاس وعلانداردىڭ بەلدەسۋى بيىل تارتىستى بولعالى تۇر. جاس مولشەرىنە قاراي ءۇش توپ بويىنشا وتەتىن رەسپۋبليكالىق تۋرنيرگە 260 پالۋان قاتىسىپ، ءار سالماق بويىنشا مىقتىنى انىقتايدى.

بيىلعى «جاس بارىستار» ورال قالاسىنداعى «ارمان» سپورت كەشەنىندە بەلگىلى بولماق، دەپ حابارلايدى «قازاقستان بارىسى».

«جاس بارىسقا» قاتىسۋشىلار جاس شاماسىنا قاراي مىناداي توپتاردا كۇرەسەدى:

- بالالار (2000-2001- جىلدارى تۋىلعاندار 14-15 جاس)

 - جاسوسپىرىمدەر (1998-1999- جىلدارى تۋىلعاندار 16-17 جاس)

- جاستار (1996-1997- جىلدارى تۋىلعاندار 18-19 جاس).

بۇل رەسپۋبليكالىق تۋرنير IV كەزەڭ بويىنشا وتەدى. ياعني، قاتىسۋشىلار اۋەلى І-ІІ كەزەڭدە اۋىلدىق ەلدى مەكەندەر مەن اۋداندىق ىرىكتەۋدەن (2015-جىلدىڭ 15-30- قىركۇيەگى اراسىندا) ءوتۋى ءتيىس. Ⅲ كەزەڭدە - وبلىستىق (قالالىق) ىرىكتەۋ جارىستارىندا سىنعا تۇسسە (2015-جىلدىڭ 1-31- قازان ارالىعىندا)،  ІV  كەزەڭدە ۇزدىك شىققاندار تۋرنيردىڭ فينالىنا جولداما الادى (4-7- قاراشا كۇندەرى).

شارت بويىنشا بالۋاندار جاس شاماسىنا قاراي مىناداي سالماقتا كىلەمگە شىعادى:

14-15 جاستاعى بالالار: 38، 42، 46، 50، 55، 60، 66، 73،  73+ كەلى سالماق دارەجەلەرى؛

16-17 جاستارى جاسوسپىرىمدەر: 46، 51، 57، 64، 72، 81، 81+ كەلى سالماق دارەجەلەرى؛

18-19 جاستاعى جاستار: 55، 60، 66، 74، 82، 90، 100، 100+ كەلى سالماق دارەجەلەرى.

تۋرنيردىڭ جۇلدەگەرلەرىنە سپورت جانە دەنە شىنىقتىرۋ ىستەرى كوميتەتى تاراپىنان پلانشەت، فوتواپپارات، سمارتفون، ديپلوم جانە مەدالدار تاپسىرىلادى.