قازاقستاندا اپتا سايىن 26 مەملەكەتكە 425 اۋە رەيسى جاسالادى

استانا. قازاقپارات - حالىقارالىق رەيستەردى تۇراقتى تۇردە قازاقستاندىق ەكى اۋە كومپانيا عانا جۇزەگە اسىرادى، ولار - «ەير استانا» جانە «سكات».

 2015 -جىلى اتالمىش كومپانيالار حالىقارالىق باعىت بويىنشا 1,8 ميلليون جولاۋشىنى تاسىمالداعان. «ەير استانانىڭ» نارىقتاعى ۇلەسى 89 پايىزدى (1 ميلليون 581 مىڭ ادام)، ال «سكات» كومپانياسىنىڭ ۇلەسى 11 پايىزدى (194626 ادام) قۇرادى، دەپ حابارلايدى قازاقپارات ق ر ينۆەستيتسيالار جانە دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.

 قازاقستاندىق اۋەكومپانيالاردان بولەك، قازىرگى ۋاقىتتا حالىقارالىق اۋەتاسىمالى نارىعىندا 22 شەتەلدىك كومپانيا بار. ولاردىڭ قاتارىندا

 Turkish Airlines, Etihad, Aeroflot, KLM, Lufthansa, China Southern Airlines, Asiana Airlines, Fly Dubai,

وزبەك اۋەجەلىسى سياقتى ءىرى الەمدىك اۋە كومپانيالارى بار. دەگەنمەن، حالىقارالىق جولاۋشىلاردى تاسىمالداۋدا قازاقستاندىق كومپانيالاردىڭ ۇلەسى باسىم. ورتاشا ەسەپپەن جىل سايىن %51 جانە % 49 قۇرايدى. بۇل جەردە 51 پايىزى قازاقستاندىق اۋەكومپانيالاردىڭ ۇلەسىندە.

بۇگىنگى تاڭدا قازاقستاندا اپتاسىنا 88 حالىقارالىق باعىت بويىنشا 26 شەتەل مەملەكەتىنە 425 اۋە رەيسى جاسالادى.

 قازاقستاننىڭ ت م د ەلدەرىمەن 50 باعىت بويىنشا اۋە قاتىناسى جولعا قويىلعان (اپتاسىنا 236 رەيس). سونداي- اق تاياۋ شىعىس ەلدەرىمەن 15 باعىت (اپتاسىنا 92 رەيس)، وڭتۇستىك- شىعىس ازيا ەلدەرىمەن 14 باعىت (اپتاسىنا 69 رەيس) جانە ە و ەلدەرىمەن 9 باعىت بويىنشا (اپتاسىنا 28رەيس) اۋە قاتىناسى بار.