ا ق ش پرەزيدەنتىنىڭ ۇلى حانتەر بايدەن 25 جىلعا تۇرمەگە قامالۋى مۇمكىن

پرەزيدەنت دجو بايدەننىڭ ۇلى - حانتەرگە 2018 -جىلى قارۋ ساتىپ الۋ كەزىندە جالعان مالىمەت بەرگەنى ءۇشىن ءۇش ەپيزود بويىنشا ايىپ تاعىلىپ وتىر، دەپ حابارلايدى قازاقپارات CNN اگەنتتىگىنە سىلتەمە جاساپ.

ا ق ش تاريحىندا العاش رەت ادىلەت مينيسترلىگى بيلىك باسىنداعى پرەزيدەنتتىڭ ۇلىنا ايىپ تاقتى.

حانتەر بايدەننىڭ كىناسىن مويىنداۋ تۋرالى سوتپەن العاشقى كەلىسىمى شىلدەدە بۇزىلعاننان كەيىن وعان وسىنداي ايىپ تاعىلدى. دجو بايدەن 2024 -جىلى ا ق ش پرەزيدەنتى بولىپ قايتا سايلانۋ ءۇشىن سايلاۋالدى ناۋقان كەزىندە بۇل جاعداي كۇردەلى سوت ىسىنە ۇلاسۋى مۇمكىن.

حانتەر بايدەن 2018 -جىلدىڭ قازانىندا دەلاۆەر شتاتىنداعى قارۋ- جاراق دۇكەنىنەن ريەۆولۆەر ساتىپ الىپ جاتقاندا تىيىم سالىنعان ەسىرتكى زاتتارىن پايدالانبايتىنىن جانە وعان تاۋەلدى ەمەس ەكەنىن ايتىپ، جالعان مالىمەت بەرگەن. شىن مانىندە، ول سول كەزدە كوكاينگە تاۋەلدىلىكپەن كۇرەسىپ جاتقان بولاتىن.

قارۋ ساتىپ الار كەزدە جالعان اقپارات بەرۋ فەدەرالدىق قىلمىسقا جاتادى. حانتەر بايدەننىڭ كىناسى دالەلدەنىپ جاتسا، 25 جىلعا دەيىن تۇرمەگە قامالۋى مۇمكىن.

ا ق ش- تىڭ وكىلدەر پالاتاسىنىڭ باستاماسىمەن ۇلى حانتەردىڭ كاسىپكەرلىك قىزمەتىنە بايلانىستى دجو بايدەنگە قاتىستى تەرگەۋ باستالدى. بۇل جاعداي پرەزيدەنتكە يمپيچمەنت جاريالاۋعا اكەپ سوقتىرۋى مۇمكىن ەكەنىن حابارلاعان ەدىك.

CNN- ءنىڭ جازۋىنشا، بۇرىن وزىنە دە ءتورت رەت ايىپ تاعىلعان ا ق ش- تىڭ بۇرىنعى پرەزيدەنتى دونالد ترامپ حانتەر بايدەن تۋرالى جاڭالىققا «قايعىلى جاعداي» دەپ پىكىر ءبىلدىردى.

«بۇل - قايعىلى جاعداي، مەن مۇندايعا ەشكىم قۋانباۋى كەرەك ەكەنىن ايتقىم كەلەدى»، - دەپ مالىمدەدى ترامپ NBC News-كە.

اۆتور:

بالنۇر قوجاگەلدى