ءتورتىنشى سىنىپتاعى نەمىس بالالارىنىڭ 25 پايىزى وقي المايدى نەمەسە وقىعانىن تۇسىنبەيدى
ءبىر قىزىعى - بالالاردىڭ باسىم كوپشىلىگى مەكتەپكە بارعاندى جاقسى كورەدى، دەپ حابارلايدى قازاقپارات DW اگەنتتىگىنە سىلتەمە جاساپ.
Iglu (Internationale GRundschul-Lese-Untersuchung) حالىقارالىق جوباسىنىڭ زەرتتەۋشىلەرى نەمىس مەكتەپتەرىندەگى باستاۋىش سىنىپ وقۋشىلارى جيىرما جىل بۇرىنعىدان الدەقايدا ناشار وقيتىنىن انىقتادى.
سەيسەنبى كۇنى جاريالانعان زەرتتەۋدە نەمىس مەكتەپتەرىندەگى ءتورتىنشى سىنىپ وقۋشىلارىنىڭ 25 پايىزى (ياعني تورتتەن ءبىرى) وقىعان ءماتىنىنىڭ ماعىناسىن جەتە تۇسىنبەيتىنى ايتىلعان.
2001 -جىلى مۇنداي بالالاردىڭ ۇلەسى 17 پايىز بولعان ەدى.
وعان سەبەپ بولعان جاعدايدىڭ ءبىرى - مەكتەپتەردى بەلگىلى ءبىر كەزەڭگە جاۋىپ تاستاعان كوروناۆيرۋس پاندەمياسى بولۋى مۇمكىن. الايدا، زەرتتەۋشىلەردىڭ پىكىرىنشە، بارىنە تەك قانا پاندەميا كىنالى دەۋگە نەگىز جوق.
«وقۋ ۇلگەرىمىنىڭ تومەندەۋ تەندەنسياسى 2006 -جىلدان باستاپ بايقالعان. ارينە، پاندەميا كەزىندە بۇل ءۇردىس قارقىن الىپ، ءبىزدىڭ ءبىلىم بەرۋ سالاسىنداعى پروبلەمالار كۇردەلەنە تۇسكەنىن مويىنداۋ كەرەك»، - دەيدى دورتمۋند تەحنيكالىق ۋنيۆەرسيتەتىنىڭ عالىمى نەلە ماكيلۆاني.
وقۋ ۇلگەرىمى ناشارلاعانىمەن، بالالار ساباقتان قالمايدى، ولار مەكتەپكە بارعاندى جاقسى كورەدى
زەرتتەۋگە سەنسەك، تابىسى تومەن نەمەسە ۇيىندە نەمىس تىلىندە سويلەمەيتىن وتباسى بالالارى نەمىس تىلىندە سويلەيتىن اۋقاتتى وتباسىنداعى قۇرداستارىمەن سالىستىرعاندا ناشار وقيدى ەكەن.
ستاتيستيكاداعى بىردەن-ءبىر قۋانتاتىن جاڭالىق - بالالاردىڭ 85 پايىزدان استامى باستاۋىش مەكتەپتى جاقسى كورەدى جانە ساباققا قۇلشىنا بارادى.
2001 -جىلى مۇنداي بالالار سانى از بولدى - شامامەن 79 پايىز.
ساراپشىلار جاعدايدى وزگەرتۋ ءۇشىن گەرمانيا بيلىگىن دەرەۋ ارەكەت ەتۋگە شاقىردى.
1955 -جىلدان بەرى گەرمانيانىڭ جەتەكشى ۇيىمى سانالاتىن Arbeitskreis für Jugendliteratur ۇيىمىنىڭ ءتوراعاسى رالف شۆايكارتتىڭ ايتۋىنشا، بيلىك وقۋدى دامىتۋدىڭ ناقتى، ءتيىمدى جانە بۇرىننان قالىپتاسقان شارالارىن ماقساتتى تۇردە قولعا الىپ، وسى باعىتقا ينۆەستيتسيا سالۋى كەرەك.
