گەرمانيا پوليسياسى مەملەكەتتىك توڭكەرىسكە دايىندىق جاساعان 25 كۇدىكتىنى ۇستادى

ادىلەت ءمينيسترى ماركو بۋشمان بۇل ۇيىم گفر زاڭدىلىعىن مويىندامايتىن Reichsbürger يدەولوگياسىنىڭ بولىگى ەكەنىن ايتتى، دەپ حابارلايدى قازاقپارات Deutsche Welle گە سىلتەمە جاساپ.

سارسەنبى كۇنى تاڭەرتەڭ جۇرگىزىلگەن ءتىنتۋ جۇمىستارى بارىسىندا وسى لاڭكەستىك ۇيىمنىڭ مۇشەلەرى مەن جاقتاستارى دەپ تانىلعان 25 كۇدىكتى ۇستالدى.

بۋشمان تەرگەۋدىڭ كۇدىكتى Reichsbürger قوزعالىسىمەن بايلانىسى بار لاڭكەستىك ۇيىمعا قارسى باعىتتالعانىن ايتتى.

ونىڭ ايتۋىنشا، ءتىنتۋ گەرمانيانىڭ مەملەكەتتىك مەكەمەلەرىنە قارۋلى شابۋىل جاساۋدى جوسپارلادى دەگەن كۇدىككە ىلىنگەن ادامدارعا قاتىستى جۇرگىزىلگەن.

«بۇگىن تاڭەرتەڭنەن بەرى لاڭكەستىككە قارسى ءىرى وپەراتسيا ءجۇرىپ جاتىر. فەدەرالدى باس پروكۋرور كۇدىكتى لاڭكەستىك ۇيىمدى تەرگەپ جاتىر. كونستيتۋتسيالىق ورگاندارعا قارۋلى شابۋىل جاساۋ جوسپارلانعان دەگەن كۇدىك بار»، - دەپ جازدى بۋشمان.

ىزدەۋ وپەراتسياسى گەرمانيانىڭ ون ءبىر فەدەرالدى ايماعىنداعى 52 كۇدىكتىگە تيەسىلى 130 مۇلىكتى قامتىدى، دەپ حابارلاندى.

پروكۋراتۋرا وكىلدەرىنىڭ ايتۋىنشا، قاماۋعا الىنعان كۇدىكتىلەر «2021 -جىلدىڭ قاراشا ايىنىڭ سوڭىنا قاراي قۇرىلعان تەرروريستىك ۇيىمعا جاتادى. ول گەرمانيانىڭ قولدانىستاعى مەملەكەتتىك ءتارتىبىن قۇلاتۋدى جانە ونى وزدەرى قۇرعان مەملەكەتتىك فورماسىمەن الماستىرۋدى ماقسات ەتكەن».

Reichsbürger قوزعالىسى براندەنبۋرگ، مەكلەنبۋرگ- پومەرانيا جانە باۆاريا ەلدەرىندەگى ءبىرقاتار شاعىن ۇيىمدار مەن جەكە تۇلعالاردان تۇرادى. ولار گەرمانيا فەدەراتيۆتىك رەسپۋبليكاسىنىڭ دا، ونىڭ كەز- كەلگەن مەملەكەتتىك ورگاندارىنىڭ دا زاڭدىلىعىن مويىندامايدى.