بيىل اقىلى جولداردان 25 ميلليارد تەڭگە پايدا ءتۇستى
بۇل تۋرالى يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ ءتوراعاسى تولەگەن ابدۋللين ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدەگى اۆتوموبيل جولدارىنىڭ جالپى ۇزىندىعى - 96 مىڭ شاقىرىم. ونىڭ ىشىندە 25 مىڭ شاقىرىم - جول رەسپۋبليكالىق ماڭىزى بار، ال 71 مىڭ شاقىرىم - وبلىستىق جانە اۋداندىق ماڭىزى بار جول. رەسپۋبليكالىق ماڭىزى بار جولدار يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ قاراماعىندا. مەملەكەتتىك تاپسىرما شەڭبەرىندە دامىتۋ جانە كۇتىپ ۇستاۋ جونىندەگى جۇمىستاردى ۇيىمداستىرۋدى وپەراتور «قازاۆتوجول» ۇلتتىق كومپانياسى جۇزەگە اسىرادى. وبلىستىق جانە اۋداندىق ماڭىزى بار اۆتوجولداردى، سونداي-اق كوشە-جول جەلىسى جەرگىلىكتى اتقارۋشى ورگانداردىڭ جاۋاپكەرشىلىگىندە»، - دەدى تولەگەن ابدۋللين ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
كوميتەت باسشىسىنىڭ ايتۋىنشا، بيىل قولدانىستاعى 11 مىڭ شاقىرىمنان استام اۆتوجولعا قۇرىلىس- مونتاجداۋ جۇمىسى ءجۇرىپ جاتىر.
«بيىلعى 1- قاراشاداعى جاعدايعا سايكەس 2200 شاقىرىم اقىلى جولدان شامامەن 25 ميلليارد تەڭگە جينالدى. جينالعان سوما الدىمەن جول ۋچاسكەلەرىن جوندەۋ مەن كۇتىپ ۇستاۋعا جۇمسالادى»، - دەيدى ول.
