10:26, 20 - شىلدە 2022 | GMT +5
اقتاۋلىق تۇرعىننىڭ كوز ۇياشىعىندا 25 جىل جاتقان اينەك الىندى
نۇر-سۇلتان. قازاقپارات - دارىگەرلەر اقتاۋ تۇرعىنىنىڭ كوزىنىڭ استىنا كولىك اپاتى كەزىندە كىرگەن شىنى اينەكتى 25 جىلدان كەيىن الدى.
ول وسى ۋاقىتقا دەيىن كوز ۇياشىعىندا شىنى سىنىعى قالىپ قويعانىن بىلمەي كەلگەن دەپ حابارلادى turkystan.kz.
«1997 -جىلى قىز اپاتقا ۇشىراپ، سونىڭ سالدارىنان بىرنەشە كۇن بويى ەس-ءتۇسسىز جاتقان. كەيىن ول ەسىن جيىپ، ينفراوربيتالدى ايماقتا كەڭ تىرتىقپەن جانە دەفورماتسيالانعان كوزىمەن ادەتتەگى ءومىرىن قايتا باستاعان. الايدا، سول ءساتسىز كۇندەردەن بەرى ونىڭ كوزىنىڭ استىندا اۋىرسىنۋ پايدا بولىپ، جاس اعۋ جانە باسقا دا بەلگىلەر ونىڭ مازاسىن العان. قانشا دارىگەرلەرگە كورىنىپ، ءتۇرلى ماماندارعا جۇگىنسە دە ەش ناتيجە بولماعان»، - دەدى ەمحاناداعىلار.
25 جىلدان كەيىن اقتاۋداعى جەكە كلينيكالاردىڭ ءبىرىنىڭ ماماندارى ناۋقاستىڭ كوزىنىڭ استىنان كولەمى 5 ميلليمەتر بولاتىن شىنى سىنىعىن تاپتى. شىنى ناۋقاستىڭ تىندەرىنەن قاۋىپسىز تۇردە شىعارىلعان.
