ادامداردى 25 ميلليون تەڭگەگە الداپ سوققان الماتىلىق ايەل ۇستالدى
الاتاۋ اۋداندىق پوليتسيا باسقارماسىنىڭ مالىمەتىنشە، قالا تۇرعىندارىنا «جاقسى جاعداي جاسايمىن» دەپ الداپ كەتكەن 44 جاستاعى د. ەسىمدى ازاماتشا ۇستالدى.
«تەرگەۋ بارىسىندا ايەل ادامنىڭ وزگەلەردىڭ سەنىمىنە كىرىپ، جەر تەلىمدەرىن، پاتەرلەردى جانە باسقا دا جىلجىمايتىن مۇلىكتى نارىق باعاسىنان تومەن باعاعا ساتىپ الۋدى ۇسىنعانى انىقتالدى. «كليەنتتەر» جەتكىلىكتى بولدى. كۇدىكتى ادامداردان «ساتىپ الۋ» ورنىنا قاراي 2 ميلليوننان 7 ميلليونعا دەيىن باستاپقى جارنانى العان سوڭ ءىز- ءتۇزسىز جوعالىپ كەتكەن. قازىرگى ۋاقىتتا ونىڭ 14 الاياقتىققا قاتىسقانى دالەلدەندى»، - دەيدى الاتاۋ اۋداندىق پوليتسيا باسقارماسىنىڭ باستىعى ءىلياس ومىرسەرىكوۆ.
جالپى ماتەريالدىق شىعىن - 25 ميلليون تەڭگەدەن اسادى. كۇدىكتى ۇستالدى جانە ق ر قىلمىستىق ءىس جۇرگىزۋ كودەكسىنىڭ 128-بابىنا سايكەس ۋاقىتشا ۇستاۋ يزولياتورىنا قامالدى.
«بۇرىن د. ەسىمدى ازاماتشانىڭ سوتتىلىعى بولعان جوق. الايدا ونىڭ باسقا ەپيزودتارعا قاتىسى بار بولۋى مۇمكىن ەكەندىگى جوققا شىعارىلمايدى. وسىعان وراي، ازاماتتاردى سۋرەتكە قاراپ، جەكە باسىن انىقتاعان جاعدايدا مىنا تەلەفون نومىرلەرى ارقىلى حابارلاسۋلارىن سۇرايمىز: 2275502؛ 87083805400؛ 87083747425»، - دەدى پوليسيا وكىلى.