اقتوبەدە شارتتى تۇردە مەرزىمىنەن بۇرىن بوساتىلعان 25 ادام قايتادان تۇرمەگە ءتۇستى
اقتوبە وبلىسىنىڭ ۋچاسكەلىك پوليتسيا ينسپەكتورلارى جىل باسىنان بەرى «ەسەپ» جانە «ەسەپ ەلەمەنتى»، «تۇرمىس»، «قۇقىقتىق ءتارتىپ»، «ۋچاسكە» سياقتى جەدەل-الدىن الۋ شاراسىن، سونداي-اق رەيد وتكىزدى.
ناتيجەسىندە بيىل 5 ايدىڭ قورىتىندىسى بويىنشا وبلىس اۋماعىندا جاساعان قىلمىس %21,6 تومەندەدى. بوستاندىققا شىققاننان كەيىن قوعامدىق ءتارتىپ پەن ازاماتتاردىڭ تىنىشتىعىن بۇزۋدى جالعاستىرعان 25 ادام قايتادان باس بوستاندىعىنان ايىرىلدى.
اقتوبە وبلىسى بويىنشا قىلمىستىق اتقارۋ جۇيەسى دەپارتامەنتى پروباتسيا قىزمەتىمەن بىرلەسكەن جۇمىس ناتيجەسىندە قوعامدىق ءتارتىپتى جۇيەلى تۇردە بۇزعان 75 ادامعا قاتىستى شارتتى جازانى باس بوستاندىعىنان ايىرۋعا اۋىستىردى. ال سوتتالعان 4 ادامنىڭ سىناق مەرزىمى ۇزارتىلدى.
«پوليتسيا دەپارتامەنتى ق ا ج د جانە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىمەن بىرلەسىپ باس بوستاندىعىنان ايىرۋ ورىندارىنان بوساتىلعان ادامداردى جۇمىسقا ورنالاستىرۋ، ولاردى جاڭا ماماندىققا قايتا وقىتۋ ماسەلەلەرىن شەشۋ بويىنشا شارالار قابىلداپ جاتىر. جۇمىسپەن قامتۋ جانە الەۋمەتتىك باعدارلامالار ورگاندارىنا بوستاندىققا شىققان ادامداردىڭ مەكەنجايى بەرىلدى»، - دەيدى ج پ ق ب باستىعىنىڭ ورىنباسارى امانتۇرلى تاكەشيەۆ.
«اتامەكەن» كاسىپكەرلەر پالاتاسىنىڭ قاتىسۋىمەن بوس ورىندار جارمەڭكەسى، باس بوستاندىعىنان ايىرۋ ورىندارىنان بوساتىلعان ادامداردى جۇمىسقا ورنالاستىرۋعا جانە قايتا وقىتۋعا جاردەمدەسۋ بويىنشا ءتۇرلى اكسيالار وتكىزىلىپ تۇرادى.
بيىل 217 ادام جۇمىسقا ورنالاستىرىلىپ، ەكى ادام قىسقا مەرزىمدى وقۋعا جىبەرىلدى.