الماتى وبلىسىنىڭ تۇرعىنى 25 جول بەلگىسىن ۇرلاپ كەتكەن
ونىڭ ءارقايسىنىڭ قۇنى 4800 تەڭگە تۇرادى، دەپ حابارلايدى قازاقپارات ءتىلشىسى. الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 17-مامىر كۇنى تۇنگى ساعات 02:00 شاماسىندا پاترۋلدىك پوليتسيا قىزمەتكەرلەرى كۇدىك تۋدىرعان كولىكتى بايقاعان. تالعار اۋدانىنىڭ پانفيلوۆ اۋىلىندا اتالعان كولىكتى تەكسەرۋ كەزىندە تەمىردەن دايىندالعان 25 جول بەلگىسى تابىلعان. كولىكتى 32 جاستاعى ازامات تىزگىندەگەن. ايتۋىنشا، ول جول بەلگىلەرىن تۇزدىباستاۋ اۋىلىنا جاقىن جەردەن ۇلكەن الماتى كانالى بويىنان ۇرلاپ العان. ماقساتى - تەمىر قابىلداۋ ورنىنا وتكىزۋ.
«ءار جول بەلگىسىنىڭ قۇنى - 4800 تەڭگە. جالپى شىعىن كولەمى - 120000 تەڭگە. جول بەلگىلەرىن ۇرلاۋ ارقىلى مەملەكەتكە ماتەريالدىق شىعىن كەلتىرىپ قانا قويماي، جول قوزعالىسى قاۋىپسىزدىگىنە تىكەلەي قاۋىپ توندىرەسىزدەر. جول بەلگىلەرىنىڭ بولماۋى سالدارىنان ءتۇرلى جول اپاتى بولىپ، ادام دا كوز جۇمۋى مۇمكىن»، - دەدى تالعار اۋداندىق پوليتسيا باسقارماسىنىڭ باستىعى جانبولات زيادين.
اۆتور: سامال قابىشەۆا
