قازاقپارات كۇنتىزبەسى: 25- جەلتوقسان

روجدەستۆو مەرەكەسى (باتىس حريستياندار)

حريستيانداردىڭ باستى مەرەكەلەرىنىڭ ءبىرى. الەمنىڭ 100 دەن استام ەلىندە مەملەكەتتىك مەيرام دارەجەسىندە. ەۋروپانىڭ كوپتەگەن ەلدەرىندە بۇل مەرەكە - ناعىز وتباسىلىق مەيرام سانالادى.

روجدەستۆونى تويلاۋ ەكى-ءۇش كۇنگە سوزىلادى دا ءداستۇرلى ءبىرىنشى جۇلدىز جانعان ساتتە كەشكى اسقا وتىرۋدان باستالادى.

ەستە قالار وقيعالار

1979-جىلى «ەجەلگى تاراز ەسكەرتكىشتەرى» مەملەكەتتىك قورىق-مۇراجايى قۇرىلدى. ونىڭ قۇرامىنا ەجەلگى تاراز قالاسىنىڭ جۇرتى، ايشا ءبيبى، قاراحان، باباجى قاتىن، داۋىتبەك (شامانسۇر) كەسەنە عيماراتتارى، قالي ءجۇنىس مونشاسى، ءابدىقادىر مەشىتى، ساقتاردىڭ ۇشتوبە قورعانى، تومەنگى بارىسحان، اتلاح، اداحكەت، حامۋكەت، جىكىل قالالارىنىڭ جۇرتى، ت. ب. تاريحي جانە مادەني ەسكەرتكىشتەر بىرىكتىرىلگەن.

2000 -جىلى الماتىدا تۇڭعىش وتاندىق ءوندىرىستىڭ تروللەيبۋسى جاسالدى.

2006 -جىلى الماتىدا «احمەت جۇبانوۆ» اتتى دەرەكتى فيلمنىڭ پرەمەراسى بولدى. اۆتورى - تانىمال رەجيسسەر قاليلا وماروۆ. فيلمنىڭ سەناريىن مۋزىكانت جۇبانوۆتىڭ قىزى اجار احمەت قىزىمەن بىرگە جازعان.

فيلمدە كەيىپكەردىڭ تانىمال جانە بەلگىسىز ءومىرىنىڭ كورىنىستەرى پايدالانىلعان. ا. جۇبانوۆتىڭ تۋعان جەرى - اقتوبە وبلىسىندا جانە الماتىدا، استانادا جانە پاريجدەگى مەرەيتويلىق شارالار وتكەن يۋنەسكونىڭ شتاب-پاتەرىندە تۇسىرىلگەن.

ماسكەۋ مۇراعاتتارىنان ماتەريالدار پايدالانىلعان. فيلمدە جۇبانوۆتار اۋلەتىنىڭ كوپتەگەن مۇشەلەرى جانە ونىڭ شوبەرەسى، جاس تانىمال ديريجەر الان بورىبايەۆ تا قاتىسقان.

2012 -جىلى استانا ت م د جانە ەۋرازەق قالالىق تاجىريبەلەرىنىڭ «تۇرعىڭ كەلەتىن قالا» V كورمە-بايقاۋىنىڭ لاۋرەاتى اتاندى. اتالعان بايقاۋ ماسكەۋدە «مەگاپوليس: XXI عاسىر: قالا جانە بالالار» اتتى IV حالىقارالىق فورۋم اياسىندا ءوتتى. قازاقستان استاناسىنىڭ اتىنان كەلگەن دەلەگاتتارعا رەسەي مۋنيتسيپالدىق اكادەمياسىنىڭ ناگرادالارى مەن استانالار مەن ءىرى قالالاردىڭ حالىقارالىق اسسامبلەياسىنىڭ ديپلومدارى تابىستالدى.

استانا قالاسى مۇنداي ابىرويلى ناگراداعا جاستاردىڭ ەڭبەكپەن قامتىلۋى سالاسىنداعى پروبلەمالاردى شەشۋگە باعىتتالعان «جاسىل ەل» جالپى ۇلتتىق باعدارلاماسىن جاساپ، ىسكە اسىرعانى ءۇشىن قول جەتكىزدى.

2012 -جىلى ق ر پرەزيدەنتى نۇرسۇلتان نازاربايەۆ «Astana Solar» ج ش س- ءنىڭ ۇجىمىن فوتوەلەكترلىك مودۋلدەردىڭ ءوندىرىسى بويىنشا زاۋىتتا ىسكە قوسۋ-جوندەۋ جۇمىستارىنىڭ باستالۋىمەن قۇتتىقتادى.

2014 -جىلى قازاقستان پرەزيدەنتى نۇرسۇلتان نازاربايەۆ ءۇش دارەجەدەن تۇراتىن ارنايى ەڭبەك داڭقى وردەنىن تاعايىندادى. ءۇش دارەجە يەگەرى ەڭبەك ەرىنە تەڭەسەدى. ەڭبەگىمەن ەلەنگەن جۇمىسكەرلەر، شارۋالارعا عانا بەرىلەدى.

2015 -جىلى «قازپوشتا» ا ق ەكسپو-2017 حالىقارالىق مامانداندىرىلعان كورمەسىنە ارنالعان پوشتا ماركالارىن اينالىمعا شىعاردى. ماركا 4 بوياۋلى وفسەتتىك تاسىلمەن باسىلدى. فورماسى - سەگىز ماركادان تۇراتىن ماركا پاراعى. پاراقتىڭ ولشەمى: 140x 120، ماركانىڭ ولشەمى 28x 40. تارالىمى 5 مىڭ دانا. سۋرەتشىسى ك. پلۋجنيكوۆا. ماركانىڭ نومينالى 300 تەڭگە.

2015 -جىلى قازاقستان رەسپۋبليكاسىنىڭ ۇلتتىق بانكى «دالا قازىناسى» سەرياسىنىڭ «القا» ەستەلىك كۇمىس مونەتالارىن اينالىمعا شىعاردى. نومينالى: 500 تەڭگە، مەتالدىڭ قۇرامى: 925 سىنامالى كۇمىس، ماسساسى - 31,1 گ، ءتورت قىرلى مونەتا ديامەترى 43 م م شەڭبەردىڭ ىشىنە سىيادى. دايىنداۋ ساپاسى: proof. تارالىمى: 3000 دانا.

2017 -جىلى جىل سايىن بەرىلەتىن ءتورتىنشى «Asian Chess Excellence Awards» سىيلىعىن تاپسىرۋ راسىمىندە قازاقستاندىق گروسسمەيستەر دينارا ءسادۋاقاسوۆا 2017 -جىلى ازيانىڭ ۇزدىك بويجەتكەن ويىنشىسى اتاندى.

2018 -جىلى جاس عالىمدار كەڭەسى قۇرىلدى. ونىڭ نەگىزگى ميسسياسى عىلىم، عىلىمي- تەحنيكالىق قىزمەت جانە جاس عالىمدار مەن باسقا دا عالىمداردىڭ ەڭبەگىندەگى عىلىمي-تەحنيكالىق قىزمەت ناتيجەلەرىن كوممەرتسيالاندىرۋ سالالارىنداعى مەملەكەتتىك ساياساتتى جۇزەگە اسىرۋ بويىنشا ۇسىنىستار ازىرلەۋگە قاتىسۋ.

2019 -جىلى رەجيسسەر الديار بايراقىموۆتىڭ «نا گراني» فيلمى گرەكيانىڭ پيرگوس قالاسىندا وتكەن حالىقارالىق «وليمپيا» بالالار جانە جاس وسپىرىمدەرگە ارنالعان كينوفەستيۆالدە كينوسىنشىلاردىڭ ارنايى جۇلدەسىمەن ماراپاتتالدى.

بۇعان دەيىن «نا گراني» فيلمى رەسەيدىڭ اناپا قالاسىندا وتكەن ت م د جانە بالتىق ەلدەرى كينوسىنىڭ «كينوشوك» اشىق كينوفەستيۆالىنىڭ نەگىزگى بايقاۋىنا قاتىسقان، سونداي-اق بەلارۋس ەلىندە وتكەن «ليستوپاد» حالىقارالىق كينوفەستيۆالىندە ۇزدىك سەناري ءۇشىن قازىلار القاسىنىڭ ارنايى جۇلدەسىمەن جانە يۋنيسەف قورىنىڭ سىيلىعىمەن ماراپاتتالعان. سونىمەن قاتار، بۇل فيلم بۇعان دەيىن «ۇزدىك دەبيۋت» نوميناتسياسى بويىنشا قازاقستان كينەماتوگرافيستەر وداعىنىڭ «قۇلاگەر» جۇلدەسىنە يە بولدى.

2019 -جىلى قازاقستان رەسپۋبليكاسىنىڭ ۇلتتىق بانكى نومينالى 500 تەڭگەلىك «قازاقستاننىڭ بەينەلەۋ ونەرى» مونەتالار سەرياسىنان «Á. Qasteev «Búrkitshy « كوللەكتسيالىق مونەتالارىن جانە نومينالى 100 تەڭگەلىك «ەستە قالاتىن وقيعالار مەن ءبىرتۋار ادامدار» سەرياسىنان «y . Jansúgirov. 125 jyl» ، «S. Seifýllin. 125 jyl» ، «B. Mailin. 125 jyl» ، «T. Rysqulov. 125 jyl» كوللەكتسيالىق مونەتالارىن اينالىسقا شىعاردى.