شىمكەنتتە كارانتين 25- مامىرعا دەيىن ۇزارتىلدى
بۇل تۋرالى اقپاراتتىق كوممۋنيكاتسيا- ورتالىعىندا وتكەن بريفينگتە شىمكەنت قالاسى اكىمىنىڭ ءبىرىنشى ورىنباسارى ەربول سادىر ءمالىم ەتتى، دەپ حابارلايدى قازاقپارات ءتىلشىسى.
ە. سادىردىڭ ايتۋىنشا، ەلىمىزدە بۇگىننەن باستاپ توتەنشە جاعداي رەجيمى الىنعانىمەن، پاندەميانىڭ كەڭ تارالۋىنا جول بەرمەۋ ماقساتىندا شاھاردا كارانتين ءتارتىبى ساقتالادى.
قازىرگى تاڭدا قالانىڭ كىرەبەرىستەرىندە 18 بلوكپوست جۇمىس ىستەپ تۇر. بارلىق جاعداي قاتاڭ باقىلاۋعا الىنىپ، كارانتين تالاپتارى ءبىرشاما جەڭىلدەتىلۋدە.
«شىمكەنت قالاسى اۋماعىندا كارانتين ءتارتىبى 25- مامىرعا دەيىن ساقتالادى. بۇگىننەن باستاپ قوعامدىق كولىكتەر تاڭعى 07:00 مەن كەشكى 21:00 ارالىعىندا ءتيىستى سانيتارلىق نورمالاردى ساقتاي وتىرىپ، جۇرە باستايدى. قالا اۋماعىنداعى بازارلار دا ەرتەڭنەن باستاپ 10:00 دەن 18:00 ارالىعىندا جۇمىس ىستەيدى. تەك اۆتوكولىك بازارى مەن مال بازارلارى اشىلمايدى»، - دەدى ەربول سادىر.
