قورداي وقيعاسى بويىنشا 25 ادام ۇستالدى - باس پروكۋراتۋرا

None
None
نۇر- سۇلتان. قازاقپارات - بۇگىن ەلىمىزدىڭ ءۇش وڭىرىندە قورداي اۋدانىنداعى جاپپاي تارتىپسىزدىككە بەلسەنە قاتىسقان 25 ادام ۇستالدى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر باس پروكۋرورىنىڭ ورىنباسارى ەرلىك كەنەنبايەۆ ايتتى، دەپ حابارلايدى قازاقپارات ءتىلشىسى. «بۇگىن جامبىل وبلىسىندا، الماتى جانە شىمكەنت قالالارىندا قورداي اۋدانىنداعى جاپپاي تارتىپسىزدىككە بەلسەندى قاتىسۋشىلاردى ۇستاۋ بويىنشا ارنايى وپەراتسيا جۇرگىزىلدى. ونىڭ ناتيجەسىندە 25 ادام ۇستالدى. ولاردىڭ ىشىندە قازاقتار، دۇنگەندەر، قىرعىزدار بار. ونىڭ 7 ەۋى بۇرىن سوتتالعان. ءىستى تەرگەۋ جالعاسۋدا جانە ءبىزدىڭ ەرەكشە باقىلاۋىمىزدا تۇر. بارلىق پروتسەسسۋالدىق شەشىمدەر زاڭناماعا سايكەس قاتاڭ قابىلدانۋدا. جينالعان دالەلدەمەلەرگە تياناقتى تالداۋ جۇرگىزىپ جاتىرمىز. جاپپاي تارتىپسىزدىككە قاتىسۋشىلاردىڭ ءاربىرىنىڭ رولىنە باعا بەرىلۋدە» ، - دەدى ول.

وسى رەتتە باس پروكۋروردىڭ ورىنباسارى بارلىق قازاقستاندىقتى قىلمىستىق ءىستىڭ تەرگەلۋى بارىسى جايىندا تەك رەسمي دەرەك كوزدەرىنە سەنۋگە شاقىردى. «ءارتۇرلى ارانداتۋشىلارعا ەرمەۋلەرىڭىزدى سۇرايمىن. جالعان مالىمەتتەردى تاراتۋعا جانە جولداۋعا جول بەرمەۋ قاجەت. سوت تورەلىگىن جۇزەگە اسىرۋعا جانە سوتقا دەيىنگى تەرگەۋ جۇرگىزۋگە كەدەرگى جاساعانى ءۇشىن ق ر قىلمىستىق كودەكسىنىڭ 407-بابىمەن قىلمىستىق جاۋاپكەرشىلىك كوزدەلگەنىن ەسكەرتەمىن. بۇگىن تولىق سەنىممەن قوردايداعى جاعداي تۇراقتى دەپ ايتا الامىن» ، - دەدى ەرلىك كەنەنبايەۆ.

سوڭعى جاڭالىقتار