جاپونيادا جەر سىلكىنىستەرىنىڭ سالدارىن جويۋعا 25 مىڭ سارباز جۇمىلدىرىلدى

توكيو. قازاقپارات - بەيسەنبى كۇنى تاڭەرتەڭ جاپونيانىڭ حوككايدا ارالىندا ەكىنشى رەت جەر سىلكىندى، ماگنيتۋداسى - 5,4. تۇندە بۇل اۋماقتا 6,7 بال قۋاتىمەن كۇشتى ءزىلزالا بولعان ەدى.

بۇل تۋرالى جاپونيانىڭ ۇلتتىق مەتەورولوگيالىق باسقارماسىنان ءمالىم ەتتى، دەپ حابارلادى ت ا س س.

جەراستى دۇمپۋلەرىنىڭ وشاعى تۇندە جانە تاڭەرتەڭ ارالدىڭ وڭتۇستىك-باتىسىندا يبۋري ايماعىندا ورنالاستى. تەرەڭدىگى - 40 شاقىرىم. 6,7 بالدىق جەر سىلكىنىسى جەرگىلىكتى ۋاقىتپەن ساعات 03:12 دە بولدى.

جاپونيانىڭ ءوزىن-ءوزى قورعاۋ كۇشتەرىنىڭ 25 مىڭ جاۋىنگەرى تابيعات اپاتىنىڭ سالدارىن جويۋ ءۇشىن اتتاندىرىلدى. بۇل تۋرالى بەيسەنبى كۇنى ەلدىڭ پرەمەر-ءمينيسترى سيندزو ابە ءمالىم ەتتى.

«بۇگىنگى كۇنى قۇتقارۋ جۇمىستارىنا 4 مىڭ سارباز قاتىسۋدا. بۇل ساندى 25 مىڭعا دەيىن ۇلعايتامىز»، - دەدى پرەمەر تىلشىلەرگە.

سوڭعى مالىمەتتەر بويىنشا، ءبىر ادام قازا تاۋىپ، 50 گە جۋىعى زارداپ شەكتى. تاعى ونداعان ادام ءىز-ءتۇزسىز جوعالعاندار قاتارىندا. كوپتەگەن تاۋلى ەلدى مەكەندەردە سەلدەر ءجۇرىپ، ول كوپتەگەن سالدارعا، قيراۋلارعا الىپ كەلدى. ءبىرقاتار تەمىرجول پويىزدارى قوزعالىستارىن توقتاتتى.

سەيسمولوگتار بۇل اۋداندا سەيسموبەلسەندىلىك اپتا بويى ساقتالاتىنىن اتاپ وتۋدە.

Kyodo اگەنتتىگىنىڭ مالىمەتىنشە، حوككايدودا كەم دەگەندە 200 اۋە رەيسى توقتاتىلدى.