قازاقستان بارىسىنىڭ جەڭىمپازى 25 ميلليون تەڭگە الادى

استانا. قازاقپارات - استانا تورىندەگى «بارىس ارەنا» سپورت كەشەنىندە قازاقستان رەسپۋبليكاسى تۇڭعىش پرەزيدەنتىنىڭ جۇلدەسى ءۇشىن قازاق كۇرەسىنەن «قازاقستان بارىسى» VIII رەسپۋبليكالىق تۋرنيرى جالاۋىن جەلبىرەتتى، دەپ حابارلايدى قازاقپارات ءتىلشىسى.

بيىل استانانىڭ 20 -جىلدىعىنا وراي، ۇيىمداستىرىلىپ جاتقان جاتقان دوداعا ەلىمىزدىڭ 14 وبلىسى مەن استانا، الماتى جانە شىمكەنت قالالارىنان ىرىكتەلگەن ەڭ مىقتى 35 بالۋان قاتىسادى.

«قازاقستان بارىسى» تۋرنيرىنىڭ جۇلدە قورى دا قوماقتى. جەڭىمپاز اتانعان بالۋانعا التىن بەلبەۋ مەن التىننان قۇيىلعان «تايتۇياق» تابىستالادى. ەكىنشى جانە ءۇشىنشى ورىنعا سايكەسىنشە كۇمىس جانە قولا بەلبەۋ تاپسىرىلماق. ءار بەلدەسۋدەگى جەڭىس ءۇشىن بالۋاندارعا 100 مىڭ تەڭگەدەن بەرىلمەك.

سونىمەن قاتار، Ⅲورىن العان بالۋانعا 1,8 ميلليون تەڭگە، ال ونىڭ باپكەرىنە 900 مىڭ تەڭگە تابىستالادى. ال Ⅱورىن ءۇشىن 5,5 ميلليون تەڭگە، ونىڭ باپكەرىنە 1,8 ميلليون تەڭگە بەرىلمەك. تۋرنيردە توپ جارعان ءبىرىنشى ورىن يەگەرى 25 ميلليون تەڭگەگە يە بولادى. ال ونىڭ باپكەرىنە 3,5 ميلليون  تەڭگە تاپسىرىلادى.

ەستەرىڭىزگە سالا كەتەيىك، وسىعان دەيىن «قازاقستان بارىسى» اتاعىن ۇلان رىسقۇل، بەيبىت ىستىبايەۆ، ايبەك نۇعىماروۆ، مۇحيت تۇرسىنوۆ، ەلامان ەرعالييەۆ جەڭىپ العان بولاتىن.

 

اۆتور: كۇنسۇلتان وتارباي