ق ر بوكس فەدەراتسياسى كۋبوگىنىڭ جەڭىمپازى 25 ميلليون تەڭگە ۇتىپ الدى - فوتو
اقتىق باسەكەگە جولداما العان وڭتۇستىك قازاقستان مەن ماڭعىستاۋ وبلىسىنىڭ سپورتشىلارى ءوزارا مىقتىنى انىقتادى، دەپ حابارلايدى قازاقپارات ءتىلشىسى.
ايتا كەتەيىك، ماڭعىستاۋلىق بوكسشىلارى 2012 جانە 2016 -جىلى كۋبوكتى جەڭىپ السا، و ق و كومانداسى 2015 -جىلى جەڭىمپاز اتانعان بولاتىن. اقتىق سايىستا 52 كەلى سالماقتا ماڭعىستاۋلىق بوكسشى جاراقاتىنا بايلانىستى ويىننان شىعىپ، و ق و كومانداسىنا ءبىر ۇپاي جازىلدى. ءسويتىپ بوكسشى شالقار ايقىنباي جەڭىمپاز بولىپ تانىلدى.
تارتىستى وتكەن باسەكەدە ماڭعىستاۋلىق بوكسشى، الەم چەمپيوناتىنىڭ جۇلدەگەرى، ازيا چەمپيونى، وليمپياداعا قاتىسۋشى بەرىك ءابدىراحمانوۆ پەن سۇلتان زاۋىربەكتىڭ ويىنى بولدى. ەكى سپورتشى دا شارشاڭقىراپ قالعاندارىنا قاراماستان قايتپاي جۇدىرىقتاستى.
الايدا قارسىلاسىنان 10 جاس ۇلكەن ماڭعىستاۋلىق بوكسشىنىڭ ءوز وزىنە دەگەن سەنىمدىلىگى جەڭىسكە جەتكىزدى. ماڭعىستاۋلىق كومانداعا ۇپايدى سونىمەن قاتار نۇلبول قالجانوۆ پەن وسى جىلى وتكەن ازيا چەمپيوناتىنىڭ كۇمىس جۇلدەگەرى ەرىك ءالجانوۆتار دا قوسىپ ۇلگەردى. دەگەنمەن بۇل جولعى جەڭىس وڭتۇستىكتىڭ سپورتشىلارىنا بۇيىردى. شالقار ايقىنبايدەن كەيىن رينگكە ازيا ويىندارىنىڭ جۇلدەگەرى باعداۋلەت يبراگيموۆ پەن بەكزود حالمەتوۆ، بەك نۇرماعامبەت، ەركىن مۇحامەتجان شىقتى. ەركىن مۇحامەدجان وبلىسقا التىنشى ۇپاي الىپ بەرسە، نۇرجان بەكزاتوۆ تا قارسىلاسىنان باسىم ءتۇستى. قورىتىندى ەسەپ 7:3 بولىپ، وڭتۇستىكتىڭ بىلعارى قولعاپ شەبەرلەرى جەڭىسكە جەتتى.
وسىلايشا وڭتۇستىك قازاقستان وبلىسىنىڭ بوكسشىلارى ەكىنشى رەت قازاقستان كۋبوگىنىڭ جەڭىمپازى اتانىپ، 25 ميلليون تەڭگە ۇتىپ الدى.
«ءبىز كوماندا ساپىندا نەگىزىنەن جاس بوكسشىلاردى الىپ كەلدىك. ولار جاس تا بولسا تاجىريبەلى سپورتشىلار سانالادى. بەسەۋى حالىقارالىق دارەجەدەگى سپورت شەبەرلەرى بولسا، وزگەلەرى سپورت شەبەرلەرى. ال ۇتىپ العان 25 ميلليون تەڭگەنى وڭىردە بوكستى دامىتۋ ماقساتىندا جۇمساماقپىز. اتاپ ايتقاندا كوماندانىڭ جاتتىعۋىنا كەرەك- جاراقتىڭ ءبارىن ساتىپ الماقپىز»، - دەدى و ق و كومانداسىنىڭ باس باپكەرى نۇرلان ايتۋاروۆ.
