پوليتسەيلەر جالاقىسىنا قوسىلاتىن 25 پايىزدىق ۇستەمەنى قاشان الاتىنى بەلگىلى بولدى

استانا. قازاقپارات - ەلىمىزدىڭ ۇلتتىق ەكونوميكا مينيسترلىگى «مەملەكەت بيۋدجەت ەسەبىنەن قامتاماسىز ەتىلەتىن بارلىق مەملەكەتتىك ورگاندار ءۇشىن قىزمەتكەرلەرگە جالاقى تولەۋدىڭ ءبىرىڭعاي جۇيەسىن بەكىتۋ تۋرالى» ۇكىمەت قاۋلىسىنىڭ جوباسىن ازىرلەدى.

بۇل جايىندا قازاقپارات تىلشىسىنە ق ر ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ ءمالىم ەتتى.

«مەملەكەت باسشىسى اعىمداعى جىلدىڭ ماۋسىمىندا ىشكى ىستەر ورگاندارى قىزمەتكەرلەرىنىڭ جالاقىسىن 2017-جىلدىڭ 1- شىلدەسىنەن باستاپ 25 پايىزعا كوتەرۋدى تاپسىردى. وسىعان وراي ۇلتتىق ەكونوميكا مينيسترلىگى «مەملەكەت بيۋدجەت ەسەبىنەن قامتاماسىز ەتىلەتىن بارلىق مەملەكەتتىك ورگاندار ءۇشىن قىزمەتكەرلەرگە جالاقى تولەۋدىڭ ءبىرىڭعاي جۇيەسىن بەكىتۋ تۋرالى» ۇكىمەت قاۋلىسىنىڭ جوباسىن ازىرلەدى.

قازىرگى ۋاقىتتا قاۋلى جوباسى مۇددەلى مەملەكەتتىك ورگاندارمەن كەلىسىلىپ، پرەمەر-مينيستر كەڭسەسىنە قول قويۋ ءۇشىن ەنگىزىلدى»، - دەدى ول.

دەگەنمەن، الماس سادۋبايەۆتىڭ اتاپ وتۋىنشە، لاۋازىمدىق جالاقىنى كوتەرۋ قوسىمشا بيۋدجەت قاراجاتىن قاجەت ەتەدى.

«وسىعان بايلانىستى ىشكى ىستەر مينيسترلىگى قارجى مينيسترلىگىنە 2017-جىلدىڭ رەسپۋبليكالىق بيۋدجەتىن ناقتىلاۋ بارىسىندا رەسپۋبليكالىق بيۋدجەتتىك كوميسسيانىڭ قاراۋى ءۇشىن بيۋدجەتتىك ءوتىنىم ەنگىزدى. اعىمداعى جىلدىڭ 1- شىلدەسىنەن باستاپ قايتا ەسەپتەلىنگەن لاۋازىمدىق جالقىنىڭ كوتەرىلگەن كولەمىن تولەۋ جوعارى اتالعان قاۋلى قابىلدانىپ، اتالعان ماقساتتارعا قوسىمشا بيۋدجەتتىك قاراجاتتىڭ ءبولىنۋىن قاراستىراتىن «2017-2019-جىلدارعا ارنالعان رەسپۋبليكالىق بيۋدجەت تۋرالى» زاڭعا سايەسىنشە وزگەرتۋلەر مەن تولىقتىرۋلار ەنگىزىلگەننەن كەيىن جۇرگىزىلەدى. ءبىزدىڭ جورامالىمىزشا، بۇل تاياۋ ارالىقتا ورىن الادى»، - دەدى دەپارتامەنت باسشىسى.

اۆتور: مارلان جيەمباي