ءابدىقالىقوۆا: مەملەكەتتىك رامىزدەردىڭ 25 جىلدىعىن مەرەكەلەۋدىڭ باستى ماقساتى - قازاقستاندىق پاتريوتيزمدى ناسيحاتتاۋ

استانا. قازاقپارات - بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيا وتىرىسى ءوتتى،

 دەپ حابارلايدى قازاقپارات.

 «وزدەرىڭىزگە بەلگىلى، بيىلعى جىلى مەملەكەتتىك رامىزدەرىمىز مەملەكەتتىك تۋ مەن ەلتاڭبانىڭ قابىلدانعانىنا 25 جىل تولادى. بۇل ەلدىكتى جانە ەگەمەندىكتى ايقىندايتىن ايتۋلى داتا. سوندىقتان وسى مەرەكەلەر اياسىندا وبلىستار، استانا، الماتى قالاسى بەلگىلى ءبىر ءىس- شارالار، جۇمىستار جۇرگىزۋى قاجەت. مەملەكەتتىك رامىزدەردىڭ 25 جىلدىعىن مەرەكەلەۋدىڭ باستى ماقساتى - ماڭگىلىك ەل مۇراتتارىن، قازاقستاندىق پاتريوتيزمدى ناسيحاتتاۋ، وسكەلەڭ ۇرپاقتى تاۋەلسىزدىكتى قورعاۋعا تاربيەلەۋ بولىپ تابىلادى. سونىمەن قاتار كوميسسيا جۇمىسىنا ۆەدومستۆولىق ناگرادا بويىنشا ۇسىنىس بار»، - دەدى كوميسسيا وتىرىسىن اشقان مەملەكەتتىك حاتشى.

وتىرىس بارىسىندا ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋات ۋاليەۆتىڭ ق ر مەملەكەتتىك رامىزدەرىنىڭ 25 جىلدىعىن مەرەكەلەۋ بويىنشا جوسپارلانعان ءىس- شارالارى تۋرالى اقپاراتى تىڭدالىپ، ق ر قورعانىس ءمينيسترى ساكەن جاسۇزاقوۆتىڭ «ەل قورعانى» ۆەدومستۆولىق ناگراداسىن بەكىتۋ ۇسىنىسى قارالدى. گۇلشارا ءابدىقالىقوۆا وتىرىس قورىتىندىسىندا مەملەكەتتىك ورگاندارعا ناقتى تاپسىرمالار مەن ۇسىنىستار بەردى.

 اۆتور: مارلان جيەمباي