يان گاماچەك: قازاقستاننىڭ 25 جىلدا جەتكەن جەتىستىگى - تاريحي تابىس
بۇل ەكىجاقتى پارلامەنتارالىق قارىم-قاتىناس ءۇشىن تاريحي وقيعا، دەپ حابارلادى ءماجىلىستىڭ باسپا ءسوز قىزمەتىنەن. ن. نىعماتۋليننىڭ پىكىرىنشە، بۇل چەحيانىڭ ەكىجاقتى ارىپتەستىكتى ودان ءارى ىنتالاندىرۋعا دەگەن مۇددەلىلىگىن بىلدىرەدى. چەحيا قازاقستاننىڭ ورتالىق جانە شىعىس ەۋروپاداعى ماڭىزدى ساياسي جانە ەكونوميكالىق ارىپتەسى ەكەنىن العا تارتقان ءماجىلىس سپيكەرى قوس مەملەكەت پرەزيدەنتتەرىنىڭ ءوزارا سەنىم مەن سىندارلى قاتىناسقا قۇرىلعان ماڭىزدى كەزدەسۋلەرى ەكىجاقتى ىنتىماقتاستىقتى نىعايتۋعا سەرپىن بەرىپ كەلە جاتقانىن اتاپ ءوتتى.
پالاتا ءتوراعاسى كەزدەسۋ يەلەرىنە قازاقستان پرەزيدەنتىنىڭ بيلىك تارماقتارى اراسىندا وكىلەتتىكتەردى قايتا ءبولۋ تۋرالى ۇندەۋى جانە بيىلعى حالىققا ارناعان جولداۋدىڭ باسىم باعىتتارى جايىندا اڭگىمەلەدى. جولداۋدا اسىرەسە، ەكونوميكالىق باعىتتى جاڭعىرتۋعا ايرىقشا نازار اۋدارىلعانىن العا تارتقان ن. نىعماتۋلين قازاقستان ەكونوميكاسىندا چەحيانىڭ وزىندىك ورنى بار ەكەنىنە توقتالدى.
ماسەلەن، ءبىزدىڭ ەلىمىزدە چەحيالىق كاپيتالدىڭ قاتىسۋىمەن 100 بىرلەسكەن كاسىپورىن جۇمىس ىستەيدى. وسى ۋاقىتقا دەيىن قازاقستان ەكونوميكاسىنا تارتىلعان ينۆەستيتسيا كولەمى 186 ميلليون دوللاردى قۇرايدى. ال، بۇگىنگى كۇنى ءوزارا ءىس-قيمىلدى ودان ءارى كۇشەيتۋدىڭ باسىم باعىتتارى اۋىل شارۋاشىلىعى، ماشينا قۇرىلىسى، ەنەرگەتيكا، فارماتسيەۆتيكالىق ءوندىرىس جانە تۋريزم سالالارى.
ءوز كەزەگىندە يان گاماچەك، قازاقستاننىڭ 25 جىل ىشىندە جەتكەن جەتىستىكتەرىن تاريحي تابىس دەپ باعالاي كەلىپ، قازاقستان پرەزيدەنتىنىڭ تەك ايماقتىق ەمەس، الەمدىك ساياساتتاعى تۇلعالىق رولىنە ايرىقشا كوڭىل ءبولدى. كەزدەسۋ يەلەرى وسى جىلدىڭ ماۋسىم ايىندا استانادا اشىلاتىن «ەكسپو-2017» حالىقارالىق كورمەسىن دە نازاردان تىس قالدىرمادى.
وندا چەحيا پرەزيدەنتى ميلوش زەمان قۇرمەتتى قوناق رەتىندە قاتىسادى دەپ كۇتىلۋدە. كورمەدە اتالعان مەملەكەتتىڭ ارنايى پاۆيلونى بولادى، بۇل پراگانىڭ «ەكسپو» مامانداندىرىلعان كورمەسىنە العاش رەت قاتىسۋى. جۇزدەسۋ بارىسىندا سونداي-اق، ايماقتىق قاۋىپسىزدىك، مادەني-گۋمانيتارلىق، سونىمەن بىرگە، پارلامەنتارالىق ىقپالداستىقتى كۇشەيتۋدىڭ ماڭىزدى سۇراقتارى تالقىلاندى.
