قىزىلوردادا تاتار ەتنومادەني بىرلەستىگىنىڭ 25 جىلدىعىن اتاپ ءوتتى
مەرەكەلىك شاراعا وبلىستىق قازاقستان حالقى اسسامبلەياسىنىڭ مۇشەلەرى، تاتارستان رەسپۋبليكاسىنان ارنايى شاقىرىلعان قوناقتار، بىرلەستىكتىڭ ارداگەرلەرى مەن جاستارى، بۇقارالىق اقپارات قۇرالدارىنىڭ وكىلدەرى قاتىستى.
سالتانات بارىسىندا بىرلەستىكتىڭ بەلسەندى مۇشەلەرى وبلىس اكىمىنىڭ قۇرمەت گراموتاسى جانە العىس حاتىمەن ماراپاتتالدى.
دۇنيەجۇزىلىك تاتارلار كونگرەسى اتقارۋشى كوميتەتى ءتوراعاسىنىڭ ءبىرىنشى ورىنباسارى دانيس شاكيروۆ، تاتارستان رەسپۋبليكاسىنىڭ قازاقستانداعى وكىلەتتى وكىلىنىڭ كومەكشىسى ايانا اكيمجانوۆا جانە قازاقستانداعى تاتار جانە باشقۇرت قاۋىمداستىعىنىڭ پرەزيدەنتى گابدۋلحاي يشمۋراتوۆ بىرلەستىكتى 25 جىلدىق مەرەيتويىمەن قۇتتىقتاپ، تاتار ەتنومادەني بىرلەستىگىنىڭ جەتەكشىسى گاليا گيزاتۋللينانى جانە ونىڭ بەلسەندىلەرىن دۇنيەجۇزىلىك تاتارلار كونگرەسىنىڭ مەدالىمەن ماراپاتتادى.
ايتا كەتۋ كەرەك، تاتار ەتنومادەني بىرلەستىگى 1991 -جىلدىڭ 27 -قاڭتارىندا قۇرىلدى. تاۋەلسىزدىكپەن بىرگە شاڭىراق كوتەرگەن ورتالىق اتالعان جىلدار ىشىندە ەلىمىزدىڭ ءوسىپ- وركەندەۋىنە ءوز ۇلەسىن قوسىپ كەلەدى. بىرلەستىكتىڭ العاشقى ءتورايىمى احمادەيەۆا ناعيما ابدۋل قىزى بولاتىن. ناعيما ابدۋل قىزى تاتار ەتنومادەني بىرلەستىگىن قۇرىپ، جۇمىسىن جۇيەلەپ، نەگىزىن قالادى. بىرلەستىكتى 20 جىل كولەمىندە گاليا گيزاتۋللينا باسقارىپ كەلەدى.
بۇگىنگى كۇنى قازاقستاندا 300 مىڭعا جۋىق تاتار ەتنوسى ءومىر ءسۇرىپ كەلەدى. ال، سىر ەلىندە 1500 تاتار ەتنوسى بار. ولاردىڭ بەلسەندىلەرى ۇنەمى باس قوسىپ، مادەني سالت- ءداستۇردى جاڭعىرتۋعا اتسالىسىپ، بابادان قالعان باي مۇرالارىن ساقتاپ قالۋعا بارىن سالىپ كەلەدى.
بىرلەستىكتىڭ مۇشەلەرى ءارتۇرلى سالادا تەر توگىپ، ەل دامۋى جولىندا ەڭبەك ەتۋدە. باستىسى، ولار بىرلىك پەن بەيبىت كۇندەردىڭ قادىرىن تەرەڭ ۇعىنعان. سوندىقتان دا ىنتىماقتىڭ ۇيتقىسى بولعان وبلىستىق قازاقستان حالقى اسسامبلەياسىنا ولاردىڭ العىسى شەكسىز.
مەرەكەلىك كەش اياسىندا تاتارستان رەسپۋبليكاسىنىڭ حالىق ءارتىسى فەرديناند فاتحي، حالىقارالىق كونكۋرستار مەن فەستيۆالداردىڭ لاۋرەاتى سيرينا زاينۋتدينوۆا جينالعان جۇرتشىلىققا اسەم اندەرىن تارتۋ ەتتى. تاتار حالقىنىڭ ۇلتتىق ءبيى مەن اندەرى ورىندالىپ، سىر ونەرپازدارى مەرەكەگە وراي ءوز ونەرلەرىن ورتاعا سالدى.
اۆتور: ەلۋباي اۋەزوۆ
