الماتىدا تۇرىك تىلىنە اۋدارىلعان 25 قازاق جازۋشىسىنىڭ شىعارمالار جيناعى تانىستىرىلدى
بۇگىن ق ر ۇلتتىق كىتاپحاناسىندا «اتا جۇرتتان اڭگىمەلەر - قازاقستان. مۇڭداس بۋىن» دەپ اتالاتىن تۇرىك تىلىندەگى كىتاپتىڭ رەسمي تۇساۋ كەسەر ءراسىمى ءوتتى. اتالعان كىتاپتىڭ شىعۋىنا ق ر تۇركياداعى ەلشىلىگى، «تۇركسوي» جانە تۇركياداعى ەۋرازيا كىتاپحاناشىلار قاۋىمداستىعى قولداۋ كورسەتكەن. بۇگىنگى تۇساۋكەسەر شاراسىنا ەۋرازيا كىتاپحاناشىلار قاۋىمداستىعىنىڭ ءتوراعاسى مۇستافا چالىشكان ارنايى كەلدى.
«بۇل كىتاپ بيىل تۇركيادا جارىق كورىپ، انكارا قالاسىندا تۇساۋى كەسىلدى. مۇڭداس، سىرلاس بۋىن دەسەك بولادى قازاقشا، بۇل زامانمەن سىرلاس دەگەن ۇعىم بەرەدى. بارلىق اڭگىمەلەر ارقىلى قانداس، باۋىرلاس، ەل جۇرتتىڭ ءومىرىن تانىدىق. قازاقستاننىڭ 25 جىلدىعىنا ەۋرازيا كىتاپحاناشىلار قاۋىمداستىعى اتىنان وسى كىتاپتى سىيعا تارتۋ ەتىپ وتىرمىز. ەكى مەملەكەتتىڭ قارىم- قاتىناسى نىعايۋى ءۇشىن قولىمىزدان كەلگەنىن جاسايمىز. انكارادا وتكەن تۇساۋكەسەردە تۇرىك اقىن- جازۋشىلارى كىتاپقا وڭ باعاسىن بەردى. وقىرمان رەتىندە ءوزىم دە وقىپ شىقتىم. وقي وتىرىپ، تۇركيانىڭ اۋىلىنداعى تاعدىرمەن ۇقساستىقتى كورگەندەي بولدىق. تۇركيادا اڭگىمەگە ارقاۋ بولعان تاقىرىپتاردى دا قازاق قالامگەرلەرلى قوزعاعان ەكەن»، دەدى مۇستافا چالىشكان.
ايتا كەتەيىك، قازاق قالامگەرلەرىنىڭ شىعارمالارىن تۇرىك تىلىنە اۋدارىپ، جيناقتى قۇراستىرعان - اۋدارماشى، پۋبليتسيست، قازاقستان جازۋشىلار وداعىنىڭ مۇشەسى، حالىقارالىق «تۇركسوي» ۇيىمىنىڭ وكىلى مالىك وتاربايەۆ. جيناققا بەرىك شاحانوۆ، مارحابات بايعۇت، سماعۇل ەلۋباي، نەسىپبەك ءداۋىتاي ۇلى، ناعاشىبەك قاپالبەك ۇلى، ديداحمەت ءاشىمحان ۇلى، نۇرداۋلەت اقىش، جۇماباي شاشتاي ۇلى، تۇرىسبەك ساۋكەتاي، ەرتاي ايعالي ۇلى، قۋاندىق تۇمەنباي، راقىمجان وتاربايەۆ، ماقسوت ءىزىم ۇلى، كوسەمالى ساتتىبايەۆ، قالي سارسەنباي، ءسابيت دۇسەنبيەۆ، سەرىكقالي حاسان، نۇرعالي وراز، جانابەك شاعاتاي، اسقار التاي، روزا مۇقانوۆا، ايگۇل كەمەلبايەۆا، سەرىك نۇعىمان، گۇلزات شويبەكوۆا جانە مالىك وتاربايەۆتىڭ اڭگىمەلەرى ەنگىزىلدى. بۇگىنگى شاراعا الماتىداعى تۇركيا رەسپۋبليكاسى باس كونسۋلدىعى وكىلدەرى، اقىن- جازۋشىلار، قوعام قايراتكەرلەرى قاتىستى.
اۆتور: الماس مۇقاش ۇلى
