دۋبايدا قازاقستان تاۋەلسىزدىگىنىڭ 25 جىلدىعى كەڭىنەن اتالىپ ءوتتى
3 -جەلتوقساندا دۋباي جانە سولتۇستىك امىرلىكتەردەگى قازاقستاننىڭ باس كونسۋلدىعى جەرلەس بەلسەندىلەردىڭ كومەگىمەن ەلىمىزدەگى باستى مەرەكەنىڭ قۇرمەتىنە مادەني كوپشىلىك شارا ۇيىمداستىردى. وعان ب ا ءا مەملەكەتتىك ورگاندارىنىڭ وكىلدەرى، شەتەلدىك ديپلوماتيالىق وكىلدىك باسشىلارى، جۋرناليستەر، ستۋدەنتتەر جانە امىرلىكتەردە ءومىر سۇرەتىن قازاقستاندىقتار قاتىستى. شاراعا 400 دەن استام حالىق جينالدى. شارانىڭ رەسمي بولىگىن ب ا ءا قازاقستان ەلشىسى قايرات لاما ءشارىپ پەن دۋبايداعى باس كونسۋل ارمان يساعاليەۆ اشتى.
ولار تاۋەلسىزدىك كۇنىنىڭ ماڭىزدىلىعىن اتاپ ءوتىپ، قازاقستاننىڭ نەگىزگى دامۋ كەزەڭدەرى مەن شيرەك عاسىردا قول جەتكىزگەن تابىستارىنا توقتالدى جانە قازاقستان مەن امىرلىكتەر ىنتىماقتاستىعىنىڭ جوعارى دەڭگەيىن اتاپ ءوتتى. ودان كەيىن كەلۋشىلەر تانىمال قازاقستاندىق ۇجىمداردىڭ كونسەرتىن تاماشالادى، اتاپ ايتقاندا «ءۇشقوڭىر» فولكلورلىق انسامبلى، «الاش ۇلى» ەتنو-روك توبى جانە «قاراگوز» وڭتۇستىك قازاقستان وبلىسى فيلارمونياسىنىڭ انسامبلى ونەر كورسەتتى. 
سونداي-اق، شارا اياسىندا قازاقستاندىق قولونەرشىلەر بۇيىمدارىنىڭ جارمەڭكەسى ۇيىمداستىرىلىپ، وتاندىق سۋرەتشىلەردىڭ تۋىندىلارى كورمەگە قويىلدى. باس كونسۋلدىق قىزمەتكەرلەرى مەن دەمەۋشىلەر جانە قازاق دياسپوراسى بارلىق قوناقتارعا ارناپ، ۇلتتىق تاعامدار مەن تاتتىلەر قويىلعان مول داستارحان جايدى. مەرەكە سوڭىندا ءتۇرلى جۇلدەلەر تىگىلگەن لوتورەيا ويناتىلدى. باستى سىيلىق اۋە كومپانيالارىنىڭ ءبىرى ۇسىنعان قازاقستانعا 2 تەگىن بيلەت بولدى. ءىس-شارانىڭ ەڭ قىزىقتى ءساتى جاستار مەن بالالاردىڭ قاتىسۋىمەن وتكەن «Mannequ in Challenge» زامانعا ساي فلەشموبى بولدى. دۋبايداعى وتانداستارىمىز بەن قوناقتار وسى ۇيىمداستىرىلعان سالتاناتتى شارادان جاعىمدى اسەر الىپ قايتتى.
ولار وندا قازاقتىڭ ۇلتتىق ءان جانە ءبي ونەرىن تاماشالاپ، ءداستۇرلى ونەر مەن داستارحان مازىرلەرى تۋرالى ءبىلدى. قازاقستاندىق ءىس-شارا ب ا ءا باستى ۇلتتىق مەرەكەسى تاۋەلسىزدىكتىڭ 45 جىلدىعىمەن سايكەس كەلدى.
