قازاقستاننىڭ 25 قۇرداسى «نۇر وتان» پارتياسىنىڭ مۇشەسى اتاندى
ولاردىڭ قاتارىندا عالىمدار، سپورتشىلار، دارىگەرلەر، ۆەتەرينارلار، ارتىستەر، كاسىپكەرلەر، مۇعالىمدەر، جۋرناليستەر، فەرمەرلەر جانە مەملەكەتتىك قىزمەتكەرلەر بار. جاس پاتريوتتارعا پارتيالىق بيلەتتەردى «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحممەد تاپسىردى، دەپ حابارلايدى اتالعان پارتيانىڭ باسپا ءسوز قىزمەتى.
پارتيا ورتالىق اپپاراتىنىڭ عيماراتىندا وتكەن سالتاناتتى شارادا مۇحتار قۇل-مۇحاممەد: «قازاقستان حالقى مەملەكەتىمىزدى قالىپتاستىرۋشى - تۇڭعىش پرەزيدەنت كۇنىن اتاپ وتەدى. ال ەكى اپتادان كەيىن ەڭ ۇلىق مەرەكەمىز - قازاقستان تاۋەلسىزدىگىنىڭ 25 جىلدىق تورقالى تويى. بۇل ەكى مەرەكە ەلباسىمىز، پارتيا ليدەرىنىڭ ەسىمىمەن تىعىز بايلانىستى. ەلباسىمىزدىڭ كەمەڭگەرلىك باسشىلىعىمەن تاۋەلسىز قازاقستان بۇكىل الەمگە تانىلدى. نۇرسۇلتان ءابىش ۇلى اسەم استانامىزدى سالىپ، ونى دۇنيە جۇزىنە جارقىراتا كورسەتتى. الەم حالقى ءبىزدىڭ استانامىزدى «بولاشاقتىڭ قالاسى» دەپ اتايدى. ال بولاشاق - سىزدەردىكى. بۇگىن سىزدەر ەلباسى پارتياسىنىڭ قاتارىنا قابىلداندىڭىزدار. بۇل سىزدەرگە ۇلكەن سەنىم عانا ەمەس، زور جاۋاپكەرشىلىك تە جۇكتەيدى. سىزدەردىڭ ەلباسى سەنىمىن اقتايتىندارىڭىزعا كامىل سەنەمىن، - دەدى.
سونىمەن قاتار، «نۇر وتان» پارتياسى ءتوراعاسىنىڭ ءبىرىنشى ورىنباسارى: «بۇگىندە استانادا 300 مىڭنان استام جاس بۋىن وكىلدەرى تۇرادى. اقمولا ەلىمىزدىڭ ەلورداسى اتانعان تۇستا قالا حالقى بۇدان دا از بولاتىن. سوندىقتان استانانى جاستار قالاسى دەپ تولىق سەنىممەن ايتۋعا بولادى. وكىنىشكە قاراي، استانالىق جاستاردىڭ تەك 5 پايىزى عانا «نۇر وتان» پارتياسىنىڭ مۇشەسى. بۇل ايتارلىقتاي از. سول سەبەپتى، پارتيامىز جاستاردىڭ مۇشەلىككە ءوتۋ بەلسەندىلىگىن قولدايدى. بۇگىندە ەلىمىزدەگى مينيستر، اكىم، دەپۋتات، ۇلتتىق كومپانيا باسشىلارىنىڭ اراسىندا جاستار جەتىپ ارتىلادى. تاباندىلىقپەن جۇمىس ىستەسەڭىزدەر سىزدەر دە سولاردىڭ قاتارىنان كورىنەسىزدەر. بۇل جولدا مەن سىزدەرگە شىن جۇرەگىممەن ساتتىلىك تىلەيمىن»، - دەدى.
بۇگىن پارتيالىق بيلەتتەرىن العانداردىڭ قاتارىندا ەلوردالىق تەمىرجول ۆوكزالىنىڭ جەتەكشى ينجەنەرى ەرجان ايتپانبەتوۆ، «استانا ەكسپو-2017» ۇلتتىق كومپانياسىنىڭ ءتۋريزمدى دامىتۋ جونىندەگى باس مەنەدجەرى ايبوتا جاراسبايەۆا، بەلگىلى بوكسشى جانقوش تۇراروۆ، كوكشەتاۋ ۋنيۆەرسيتەتىنىڭ ۇستازى يۋليا مونتاريدي، تانىمال ءانشى ءالي وقاپوۆ، «قازاقستان-اقتوبە» تەلەارناسىنىڭ جۋرناليسى ىڭكار قاراشايەۆا، شارۋا قوجالىعىنىڭ جەتەكشىسى قۋانىش قۇدايبەرگەنوۆ، ۆەتەرينار مانات رىسقۇلبەكوۆ، «ASTANA CITY» ۆەلوكومانداسىنىڭ سپورتشى پاۆەل گاتسكي جانە تاعى باسقالارى بار.
قاتارىنا جاس پاتريوتتاردى تارتۋ «نۇر وتاننىڭ» باسىم باعىتتارىنىڭ ءبىرى. تەك بيىل عانا پارتياعا 23 مىڭنان استام جاستار وكىلى مۇشە بولدى. ال قازىرگى تاڭدا «نۇر وتان» ساپىنداعى جاس بۋىننىڭ جالپى سانى 170 مىڭنان اسىپ جىعىلادى.
